Bogʻdorchilikning salomatlikka foydalari aniqlandi
Bogʻdorchilikning salomatlikka foydalari aniqlandi
Surunkali kasalliklarga chalingan insonlar bogʻdorchilik orqali xavotir va depressiyani yengib oʻtishi mumkin. Bu haqda Fudan universiteti va Istvan Sechenyi universiteti olimlari oʻtkazgan tadqiqotlardan maʼlum boʻldi.
Mutaxassislar jami 4 535 nafar ishtirokchi qatnashgan 23 ta ilmiy tadqiqot natijalarini tahlil qildi. Xulosalar BMC Public Health jurnalida eʼlon qilindi.
Bogʻdorchilik terapiyasi oʻsimliklar va tuproq bilan muntazam shugʻullanishni, jumladan ekin ekish, sugʻorish va hosil yigʻishni oʻz ichiga oladi. Bunday dasturlar jismoniy faollik, muloqot va tabiat bilan aloqani qoʻllab-quvvatlash usuli sifatida qaraladi. Buyuk Britaniyada bu kabi mashgʻulotlar bemorlarga ijtimoiy terapiya sifatida tavsiya etilishi mumkin.
Olimlar kamida bitta surunkali kasallik tashxisi qoʻyilgan katta yoshli odamlar ishtirok etgan tadqiqotlarni oʻrgandi. Ular orasida yurak-qon tomir kasalliklari, qandli diabet, semizlik, surunkali ogʻriq, kognitiv buzilishlar va saraton bilan yashayotganlar bor edi. Ishtirokchilarning oʻrtacha yoshi qariyb 54 yoshni tashkil etgan, ularning uchdan ikki qismi ayollar boʻlgan.
Tahlil bogʻdorchilik dasturlarida qatnashganlarda ruhiy salomatlik koʻrsatkichlari oʻrtacha darajada yaxshilanganini koʻrsatdi. Ishtirokchilar xavotir va depressiya alomatlari kamayganini bildirgan. Ayniqsa, keksalar va kognitiv buzilishlardan aziyat chekadigan bemorlar qatnashgan ayrim tadqiqotlarda bu natija yaqqol namoyon boʻlgan.
Shu bilan birga, bogʻdorchilikning jismoniy salomatlikka taʼsiri ancha past boʻlib chiqdi. Mualliflar arterial qon bosimi va kognitiv koʻrsatkichlarda sezilarli oʻzgarishlarni aniqlamadi. Hayot sifati, uyqu va ijtimoiy aloqalardan iborat umumiy salomatlik koʻrsatkichlarida esa kamroq ijobiy oʻsish qayd etildi.
Tadqiqotchilar bogʻdorchilik dasturlarini oʻzaro taqqoslash oson emasligini ham taʼkidlamoqda, chunki ular davomiyligi, intensivligi va oʻtkazilish shakli jihatidan bir-biridan farq qilgan. Bundan tashqari, ayrim tadqiqotlarda metodologik kamchiliklar boʻlgan, shuningdek, ishtirokni muddatidan oldin toʻxtatganlar koʻpligi ham natijalarga taʼsir qilgan boʻlishi mumkin.
Mualliflar fikricha, bogʻdorchilik terapiyasi samaradorligini baholash uchun yanada sifatli tadqiqotlar kerak. Hozirgacha olingan maʼlumotlar esa bu usul surunkali jismoniy kasalliklarni mustaqil davolashdan koʻra, koʻproq ruhiy farovonlikni qoʻllab-quvvatlashga yordam berishini koʻrsatmoqda.