Biroz oʻtirib, "o"lab gaplashaylik
Anqarada Turkiy davlatlar tashkilotining (TDT) 13-sammiti boʻlib oʻtadi. Uning ishtirokchilari diqqat markazida nimalar boʻladi
30 oktyabrda Ankarada Turkiy davlatlar tashkilotining (TDT) 13-sammiti doirasidagi asosiy yigʻilish boʻlib oʻtadi. Bu yil mamlakatlar yetakchilarining uchrashuvi «Turkiy asr: tilda, fikrda va ishda birlik» shiori ostida oʻtkaziladi. 29 oktyabrda Turkiya tashqi ishlar vaziri Hakan Fidan raisligida tashkilot Tashqi ishlar vazirlari kengashining yigʻilishi boʻlib oʻtdi.
Sammitning asosiy tadbiri arafasida TDTga aʼzo va kuzatuvchi davlatlar rahbarlari Turkiya poytaxtida dastlabki ikki tomonlama uchrashuvlarni oʻtkazishdi. Birinchi boʻlib, 28 oktyabr kuni Ankaraga rasmiy tashrif bilan Qozogʻiston prezidenti Qasim-Jomart Toqayev keldi, uni aeroportda Turkiya prezidenti Rejep Erdogʻan shaxsan kutib oldi. Oqoʻrda xabar qilishicha, muzokaralarda yetakchilar energetika, transport va logistika, sunʼiy intellekt, qishloq xoʻjaligi, mudofaa sanoati va gumanitar aloqalarni muhokama qilishdi.
29 oktyabr kuni Turkiya yetakchisining Oʻzbekiston prezidenti Shavkat Mirziyoyev bilan muzokaralari boʻlib oʻtdi, ularning yakunlari boʻyicha tomonlar savdo-iqtisodiy hamkorlikni kengaytirish va uzoq muddatli sheriklikni mustahkamlashga qaratilgan bir qator ikki tomonlama hujjatlarni imzoladilar.
Ankaradagi tadbirda Ozarbayjon prezidenti Ilhom Aliyevning ishtirok etmasligi oʻziga xos sensatsiyaga aylanadi. Ushbu qaror davlat rahbarining ish grafigi juda tigʻizligi va avvaldan rejalashtirilgan tadbirlarda ishtirok etishi bilan bogʻliq. Xususan, 30 oktyabr kuni Aliyev 15 yoshgacha boʻlgan oʻyinchilar oʻrtasidagi Jahon kubogi va FIFA festivali finaliga tashrif buyurishni rejalashtirmoqda. Ushbu musobaqalar tarixda ilk bor Bakuda boʻlib oʻtmoqda. Prezident topshirigʻiga binoan, TDT sammitida Ozarbayjon sharafini tashqi ishlar vaziri Jeyhun Bayramov himoya qiladi.
Dasturning asosiy qismi 30 oktyabrga moʻljallangan — tadbirlar Turkiya prezidenti Rejep Erdogʻan raisligida oʻtadi. Turkiy davlatlar rahbarlari diqqat markazida ilgarigidek «Turkiy dunyo nigohi — 2040» kontseptsiyasi doirasidagi asosiy iqtisodiy va logistik loyihalarni amalga oshirish qolmoqda. Davlat rahbarlari transport yoʻnalishlarini, jumladan Oʻrta koridorni mustahkamlash, bojxona tartib-qoidalarini soddalashtirish, energetika va raqamli transformatsiya sohalaridagi tashabbuslarni, shuningdek «TDT qishloq xoʻjaligi maʼlumotlari raqamli platformasi»ni yaratishni muhokama qiladilar.
Ishtirokchi mamlakatlar yetakchilari uchrashuvi yakunlari boʻyicha Ankara deklaratsiyasini, shuningdek, TDTning 2027–2031 yillarga moʻljallangan rivojlanish strategiyasini tasdiqlash rejalashtirilgan. Sammit davomida tashkilotga raislikni topshirish marosimi ham boʻlib oʻtadi: Turkiya uni Ozarbayjondan qabul qilib oladi.