Belgrad–Toshkent toʻgʻridan-toʻgʻri aviareysi 7–8 oydan keyin ochiladi
Serbiya Prezidenti Aleksandar Vuchich Belgrad–Toshkent toʻgʻridan-toʻgʻri aviareysi yetti-sakkiz oy ichida yoʻlga qoʻyilishi mumkinligini maʼlum qildi.
Belgrad–Toshkent toʻgʻridan-toʻgʻri aviareysini 7–8 oydan keyin ochish rejalashtirilmoqda
Belgrad va Toshkent oʻrtasidagi muntazam aviaqatnovlar yaqin yetti-sakkiz oy ichida boshlanishi mumkin. Bu haqda Serbiya prezidenti Aleksandr Vuchich Belgradda oʻtkazilgan Serbiya–Oʻzbekiston biznes-forumida maʼlum qildi.
Serbiya yetakchisining soʻzlariga koʻra, toʻgʻridan-toʻgʻri yoʻnalishni yoʻlga qoʻyish masalasi belgilangan muddatlarda hal etilishi mumkin. Vuchich kechi bilan yetti-sakkiz oydan keyin ikki poytaxt oʻrtasida muntazam reyslar bajarila boshlashiga ishonch bildirdi.
Serbiya prezidenti toʻgʻridan-toʻgʻri aviaaloqaning yoʻlga qoʻyilishini Oʻzbekiston va Serbiyaning yanada yaqinlashishi uchun muhim shart deb atadi. U yangi yoʻnalish ikki mamlakat odamlari, kompaniyalari va iqtisodiyotlari oʻrtasidagi aloqalarni rivojlantirishga xizmat qilishini taʼkidladi.
Vuchich, shuningdek, sayyohlar almashinuvi oʻsishini ham kutmoqda. Uning soʻzlariga koʻra, toʻgʻridan-toʻgʻri aloqa ochilganidan keyin koʻproq Serbiya fuqarolari Oʻzbekistonga, jumladan Samarqand va Buxoroga borishlari mumkin boʻladi. Shu bilan birga, u Oʻzbekistondan Serbiyaga keluvchi sayyohlar soni ortishini ham kutmoqda.
Ikki davlatning yaqinlashishidagi yana bir yoʻnalish Oʻzbekistonning Belgraddagi diplomatik ishtiroki boʻladi. Prezident Shavkat Mirziyoyev tashrif chogʻida Serbiya poytaxtida toʻlaqonli elchixona tashkil etilishini kutmasdan, alohida diplomatik vakolatxona ochish rejalashtirilayotganini maʼlum qildi.
Oʻzbekiston yetakchisining soʻzlariga koʻra, kelgusi haftadayoq Belgradga diplomatlar yetib kelishi kerak. Ular Serbiya kompaniyalariga oʻzbekistonlik hamkorlar bilan ishbilarmonlik aloqalarini oʻrnatish va rivojlantirishda koʻmaklashadi.
Mirziyoyevning Serbiyaga tashrifi ikki tomonlama munosabatlar tarixida Oʻzbekiston prezidentining ushbu mamlakatga ilk tashrifi boʻldi. Muzokaralar yakunida tomonlar strategik sheriklik munosabatlari oʻrnatilganini eʼlon qilishdi.