AQSh oʻz harbiy kemalari nishonga olinganini maʼlum qilganidan keyin Eronning uchta neft tankeriga zarba berdi
AQSh Markaziy qoʻmondonligining maʼlum qilishicha, hujumlar Eron uning Harbiy-dengiz kuchlariga tegishli ikkita harbiy kemasiga ballistik raketalar otganidan keyin sodir boʻlgan.
AQSh oʻz harbiy kemalari nishonga olinganini maʼlum qilganidan keyin Eronning uchta neft tankeriga zarba berdi
AQSh harbiylari mintaqadagi ikkita harbiy kemasi tomon ballistik raketalar otilganidan keyin Eronga aloqador uchta neft tankeriga zarba berganini maʼlum qildi.
AQSh Markaziy qoʻmondonligi (Centcom) shanba kuni Xarg oroli yaqinidagi bitta va Hurmuz boʻgʻozi yaqinidagi yana bir tankerni "butunlay ishdan chiqarganini" hamda Oʻmon qoʻltigʻida uchinchisini "butunlay yoʻq qilganini" bildirdi.
Centcom Islom inqilobi qoʻriqchilari korpusi (IIQK) tomonidan AQSh aviatashuvchisi va boshqariladigan raketa esminetsiga qaratilgan bir nechta hujumlarni "muvaffaqiyatli qaytarganini" maʼlum qildi. Bayonotda aytilishicha, amerikalik harbiylardan hech kim jabrlanmagan.
Bundan oldin Eron davlat OAVlari Xarg oroli sohillari yaqinida oʻz neft tankerlaridan biri AQSh raketalari tomonidan urilgani haqida xabar bergan edi.
"IIQKga yoʻllangan maktub aniq boʻlsin: agar siz bizning ikkita kemamizga qarata oʻt ochsangiz, biz bundan ham kattaroq iqtisodiy zarar yetkazamiz — sizning uchta kemangizni yoʻq qilamiz", dedi Centcom qoʻmondoni, admiral Bred Kuper.
"Biz Amerika kuchlarini himoya qilishda ikkilanib oʻtirmaymiz va agar kerak boʻlsa, Eronning cheklangan va himoyasiz neft flotini yoʻq qilamiz".
Ushbu zarbalar urushayotgan tomonlar oʻrtasidagi bir oylik nisbiy osoyishtalikdan soʻng, AQSh va Eron oʻrtasida qayta boshlangan hujumlardan deyarli bir hafta oʻtib sodir boʻldi.
AQSh va Isroil 28 fevral kuni Eronga keng koʻlamli zarbalar bergan edi, Eron esa bunga javoban Isroilga, AQSh bazalariga va Koʻrfazdagi ittifoqchi davlatlarga hujum qildi hamda Hurmuz boʻgʻozini dengiz qatnovi uchun amalda yopib qoʻydi.