Apple stol ustidagi mushukni hayday oladigan ekranli uy robotini ishlab chiqmoqda
Yangi qurilma 2027-yildayoq taqdim etilishi mumkin.
Apple stol ustidagi mushukni hayday oladigan ekranli uy robotini yaratmoqda
The Information nashri xabariga ko‘ra, Apple o‘zining birinchi uy robotini faol ravishda ishlab chiqmoqda. Bu qurilma kompaniya o‘tgan oy taqdim etgan HomeView aqlli displeyining yanada rivojlangan talqini bo‘ladi.
Kompaniya ichida bu qurilma HomeView Ultra yoki HomeView Max nomi bilan atalmoqda. Uning prototipi aylanuvchi tayanchga o‘rnatilgan 9 dyuymli ekran bilan jihozlangan. Noodatiy tuzilishi sababli dizayni xalq orasida “Jobs chirog‘i” deb atalgan klassik iMac G4 kompyuterini eslatadi. Bu nom, shuningdek, qurilmaning tashqi ko‘rinishi Pixar multfilmlari talismaniga o‘xshashligi bilan ham bog‘liq.
Yangi qurilma xona ichida mustaqil harakatlana oladi va atrof-muhit bilan o‘zaro aloqaga kirishadi. Kamera va datchiklar yordamida u, masalan, xonaga odam kirsa chiroqni o‘zi yoqadi yoki stol ustiga chiqqan mushukni haydaydi. Ishlab chiquvchilar robot atrofidagi buyumlar bilan tasodifan to‘qnashib ketmasligi uchun uning imkoniyatlarini ham yaxshilamoqda.
Qurilmaning texnik poydevori ikki yil avval ishlab chiqilgan. Biroq jamoa ichidagi kelishmovchiliklar sababli uning taqdimoti kechiktirilmoqda. Ishlab chiquvchilar dastlabki versiyaga qaysi funksiyalarni kiritish, qaysilarini esa keyingi avlodga qoldirish masalasida yakdil qarorga kela olmayapti.
Yangi robotni 2027-yilda taxminan 1000 dollar narxda sotuvga chiqarish rejalashtirilgan. Ammo uning taqdimoti 2028-yilga ham surilishi mumkin.
Avvalroq Apple g‘ildirakli yordamchi robot, uy ichida ucha oladigan dron va kiyimlarni taxlaydigan mexanizm kabi boshqa robototexnika loyihalarini ham ko‘rib chiqqan edi. Hozircha ularning qachon ishlab chiqarilishi yoki umuman taqdim etilishi noma’lum.