Apple kuçli M6 protsessoriga ega yangi MacBook Pröni taqdim etdi
U quvvatlanmasdan 24 soatgaça işlaydi va narxi 2 ming dollardan boşlanadi.
Apple kuchli M6 protsessoriga ega yangi MacBook Pro’ni taqdim etdi
Apple kompaniyasi M6 protsessori asosidagi yangi 14 dyuymli MacBook Pro’ni taqdim qildi. Qurilmaga 28-oktabrdan boshlab oldindan buyurtma berish mumkin bo‘ladi, sotuvga esa 6-noyabrdan chiqadi.
Kompaniya ma’lumotiga ko‘ra, yangi M6 chipining texnik ko‘rsatkichlari oldingi avlodnikidan sezilarli darajada farq qiladi. Uning 12 yadroli grafik protsessori 30 foizgacha tezroq ishlaydi, sun’iy intellekt vazifalariga javob beruvchi ikkita 16 yadroli Neural Engine bloki esa M5 ga nisbatan unumdorlikni 1,9 barobargacha oshiradi.
Natijada foydalanuvchilar 3D-modellashtirish, o‘yinlar va fotosuratlarni tahrirlash bilan bog‘liq vazifalarni tezroq bajarishi, shuningdek, katta til modellariga (LLM) bo‘lgan so‘rovlarni bevosita MacBook’ning o‘zida samarali qayta ishlashi mumkin.
Shu bilan birga, yangi qurilma Mac kompyuterlari orasida rekord darajadagi avtonom ishlash vaqtini — quvvatlanmasdan 24 soatgacha ishlashni va’da qilmoqda. Akkumulyatorni atigi yarim soat ichida 50 foizgacha quvvatlantirish mumkin.
Shuningdek, MacBook Wi‑Fi 7 va Bluetooth 6 standartlarini qo‘llab-quvvatlaydi hamda 12 megapikselli kamera va uchta Thunderbolt 4 portiga ega bo‘ldi. Bazaviy komplektatsiyada u 16 gigabayt tezkor xotira bilan jihozlangan bo‘lib, uni 32 GB gacha kengaytirish imkoniyati mavjud. Qurilma kumushrang va qora ranglarda, 1999 dollardan boshlanadigan narxda sotuvga chiqadi.
Apple kompaniyasining ta’kidlashicha, 2020-yilda chiqarilgan M1 protsessorli modellardan yangisiga o‘tayotgan foydalanuvchilar uchun unumdorlikning o‘sishi ayniqsa sezilarli bo‘ladi: grafika 11 barobar, sun’iy intellekt esa 13 barobar tezlashadi.