Aniqlandi va zararsizlantirildi
Terrorchilarni qoʻllab-quvvatlashda ayblanayotgan oʻzbekistonlik oʻn yillik qochib yurishdan keyin AQShga ekstraditsiya qilindi
**Aniqlandi va zararsizlantirildi**
Oʻzbekiston fuqarosi va AQShning naturalizatsiya qilingan fuqarosi, shuningdek, Kozimjon Gʻafurov va «Kozim» nomlari bilan ham tanilgan Dovud Ansariy oʻn yil davomida qochib yurganidan soʻng Tbilisidan Nyu-Yorkka ekstraditsiya qilindi.
41 yoshli Ansariy 2026 yil avgust oyida Gruziyada hibsga olingan, 23 sentyabr kuni esa Kvinsdagi Jon Kennedi nomidagi aeroportga olib kelingan.
Nashrning xabar berishicha, 24 sentyabr kuni Bruklin federal sudida qoʻlga olingan shaxsga nisbatan ayblov eʼlon qilingan. Sud uni garov evaziga ozod qilish huquqisiz hibsda qoldirdi. Agar u bir nechta moddalar boʻyicha aybdor deb topilsa, 35 yilgacha ozodlikdan mahrum etilishi mumkin.
«Bugun biz dunyoga FBR terrorchilik tashkilotlarini qoʻllab-quvvatlovchi va mamlakatni tark etib, adolatdan qochib yurganlarni unutmasligini koʻrsatmoqdamiz», — dedi FBR Nyu-York boshqarmasi direktori yordamchisi kichik Jeyms K. Barnakl.
AQSh Sharqiy okrugi prokuraturasi maʼlumotlariga koʻra, Ansariy «Islomiy davlat» (ID) va «Jabhat an-Nusra» (bir qator mamlakatlarda taqiqlangan tashkilotlar) terrorchilik tashkilotlarining taxmin qilinayotgan tarafdorlari guruhiga rahbarlik qilgan. 2014–2016 yillarda uning Bruklindagi uyidan turib harakat qilgan guruh oʻzini «tea party» — «choyxoʻrlik» deb atagan.
Ayblov talqiniga koʻra, guruh aʼzolari AQShning oʻsha paytdagi prezidenti Barak Obamani oʻldirish, Koni-Aylendda portlash sodir etish hamda politsiya va Federal tergov byurosi xodimlariga hujum qilishni muhokama qilishgan. Ular yuqorida tilga olingan terrorchilik tashkilotlari aʼzolari uchun mablagʻ yigʻishgan. Xususan, tergov talqiniga koʻra, Ansariy va uning sheriklari 2013 yilda kamida uch kishining Suriyaga safarini moliyalashtirgan. Ularning uchchalasi ham halok boʻlgan deb taxmin qilinmoqda.
Bundan tashqari, ular 2017 yil oxirida 15 yilga ozodlikdan mahrum etilgan qozogʻistonlik Ahror Saidaxmetov uchun pul yigʻishgan. U 2015 yilda, tergov maʼlumotlariga koʻra, IDga sodiqlik qasamyodini qabul qilganidan keyin hibsga olingan edi.
Guruhning yana bir taxmin qilinayotgan aʼzosi Abdurasul Joʻraboyev FBRga agar IDdan shunday buyruq olsa, «Koni-Aylendga bomba qoʻyishini» aytgan. U internetda prezidentni oʻldirib, shahid boʻlish imkoniyatini ham muhokama qilgan. «Men Obamani otib tashlash va keyin oʻzim ham otib oʻldirilishim haqida gapiryapman — bu ish beradimi? Bu kofirlarning qalbiga qoʻrquv soladi», — deb yozgan u oʻzbek tilida ID bilan bogʻliq saytda.
2016 yil may oyida Ansariy bir kun oldin sotib olingan bir tomonlama chipta bilan AQShdan Turkiyaga uchib ketgan. Uning ketishi sheriklaridan biri hibsga olinganidan besh kun oʻtib sodir boʻlgan. Oʻshandan beri Ansariy qidiruvda edi.
Sudda Ansariy til biriktirish va ikkita terrorchilik tashkilotiga moddiy yordam koʻrsatishga urinish ayblovlari boʻyicha oʻz aybini tan olmadi.
Ishni Nyu-York Sharqiy okrugi milliy xavfsizlik va kiberjinoyatchilik boʻlimi olib bormoqda.