ISHIDni moliyalashtirgan va 10 yil qidiruvda bo‘lgan o‘zbekistonlik AQSHga ekstraditsiya qilindi
ISHIDni moliyalashtirgan va 10 yil davomida qidiruvda bo‘lgan o‘zbekistonlik AQSHga ekstraditsiya qilindi
O‘zbekistonlik, hozirda AQSH fuqarosi bo‘lgan Dovud Ansoriy (Kozimjon G‘afurov) 23-sentyabr kuni Gruziyaning Tbilisi shahridan AQSHga ekstraditsiya qilindi. U terrorchi tashkilotlarga moddiy yordam ko‘rsatish va jinoiy til biriktirishda ayblanmoqda.
“Choyxona” tarmog‘i va moliyalashtirish
Sud hujjatlariga ko‘ra, Ansoriy Nyu-Yorkning Bruklin shahrida joylashgan radikal guruhga rahbarlik qilgan. Guruh Suriyaga borib, ISHID va “An-Nusra fronti” safida jang qilishni rejalashtirgan ko‘ngillilarni moliyalashtirgan.
Guruh a’zolari o‘z tarmog‘ini “Choyxona” deb atagan. Ushbu tarmoq Suriyaga ketgan jangarilar hamda halok bo‘lganlarning oilalariga yordam berish uchun mablag‘ yig‘gan. Natijada 2013-yilda kamida uch kishining Suriyaga borishi moliyalashtirilgan va ularning barchasi u yerda halok bo‘lgani taxmin qilinmoqda.
Ansoriy 2016-yil may oyida sheriklaridan biri hibsga olinganidan besh kun o‘tib, bir tomonlama chipta olib Turkiyaga qochib ketgan va shundan beri qidiruvda bo‘lgan. 2021-yil noyabr oyida Bruklindagi federal hakamlar hay’ati unga nisbatan ayblov e’lon qilgan.
U 2026-yilning avgust oyida Tbilisida hibsga olingan va 23-sentyabr kuni AQSHga olib kelingan. Bruklin federal sudida bo‘lib o‘tadigan sud majlisida unga nisbatan rasmiy ayblovlar o‘qib eshittiriladi.
Agar sud Ansoriyning aybini isbotlasa, unga 35 yilgacha ozodlikdan mahrum qilish jazosi berilishi mumkin.