Akademik litseylarning har to‘rtinchi o‘quvchisi oliygohga kirish uchun qo‘shimcha tayyorgarlik zarurligini bildirdi
O‘zbekistonda 73 ta akademik litseyda o‘tkazilgan so‘rovnomada o‘quvchilarning 70,1 foizi oliy ta’lim tashkilotiga kirish imkoniyatiga to‘liq ishonishini bildirgan. Pedagoglarning 98,6 foizi esa o‘quvchilarning oliy ta’limga tayyorgarligini ijobiy baholagan.
Akademik litsey o‘quvchilarining har to‘rtinchisi oliygohga kirish uchun qo‘shimcha tayyorgarlik kerakligini aytdi
O‘zbekistonda akademik litsey o‘quvchilarining 25,4 foizi oliy ta’lim tashkilotlariga kirish uchun qo‘shimcha tayyorgarlik zarurligini bildirgan. Bu haqda Taʼlim sifatini taʼminlash milliy agentligining akademik litseylarda o‘tkazilgan umummilliy so‘rovnoma natijalariga oid tahlilida ma’lum qilindi.
Tadqiqot 2026-yil 21-martdan 9-aprelga qadar respublikaning barcha 14 ta hududidagi 73 ta akademik litseyda o‘tkazilgan. Unda jami 27 077 nafar respondent, jumladan, 24 557 nafar o‘quvchi va 2 520 nafar pedagog ishtirok etgan.
So‘rovnoma natijalariga ko‘ra, o‘quvchilarning 70,1 foizi oliy ta’lim tashkilotlariga kirish imkoniyatiga “to‘liq ishonaman”, 25,4 foizi esa “ishonaman, lekin qo‘shimcha tayyorgarlik kerak” deb javob bergan. Shu tariqa, oliy ta’limga kirish imkoniyatiga ijobiy ishonch darajasi 95,5 foizni tashkil etgan.
Tahlilda o‘quvchilarning chorak qismidan ko‘prog‘i qo‘shimcha tayyorgarlik zarurligini bildirgani oliy ta’limga qabul jarayoniga tayyorgarlikni yanada kuchaytirish ehtiyoji mavjudligini ko‘rsatishi qayd etilgan.
Pedagoglarning 98,6 foizi o‘quvchilarning oliy ta’limga tayyorgarligini ijobiy baholagan. Shuningdek, o‘qituvchilarning 88,6 foizi akademik litseylarda ilg‘or ta’lim usullaridan foydalanish bo‘yicha ijobiy fikr bildirgan.
Biroq xalqaro ta’lim dasturlari bilan integratsiya bo‘yicha ijobiy baholar 60,9 foizni tashkil qilgan. Tadqiqotda ushbu yo‘nalishda rivojlanish imkoniyatlari saqlanib qolayotgani ta’kidlangan.
O‘quvchilar orasida o‘tkazilgan so‘rovnomada dars sifati va o‘qituvchilar mahoratidan qoniqish darajasi 86 foizni, chuqurlashtirilgan fanlarni o‘zlashtirish darajasidan qoniqish esa 92,8 foizni tashkil etgan.
Shu bilan birga, o‘quvchilarning ochiq javoblarida o‘quv jarayoni va dasturlarini takomillashtirish bo‘yicha 2 763 ta taklif bildirilgan. Imtihon va baholash tizimini yaxshilash masalalari ham ko‘tarilgan.
Tadqiqotda akademik litseylarning ixtisoslashuv yo‘nalishlari bo‘yicha ham farqlar aniqlangan. Pedagoglar baholari asosida hisoblangan umumiy ko‘rsatkich tibbiyot yo‘nalishidagi litseylarda 83,6 ball, amaliy-texnik yo‘nalishda 80,4 ball, pedagogika yo‘nalishida 77,8 ball va ijtimoiy-gumanitar yo‘nalishda 74,1 ballni tashkil etgan.
Eng yuqori va eng past natija qayd etgan yo‘nalishlar o‘rtasidagi farq 9,5 ball bo‘lgan. Tahlil xulosasida pedagogika va ijtimoiy-gumanitar yo‘nalishlarda xalqaro ta’lim elementlarini kengaytirish, chuqurlashtirilgan ta’lim mazmunini boyitish hamda o‘quv dasturlarini zamonaviy kompetensiyalar asosida takomillashtirish zarurligi qayd etilgan.