ABB 7–10 kundan keyin Davr Bankning asosiy aktsioneriga aylanadi
Ozarbayjonning ABB Bank banki Oʻzbekistondagi Davr Bank’ni sotib olish boʻyicha bitimni yakunlamoqda va 2026 yilning oktyabr oyidayoq ABB Davr brendini ishga tushirishni rejalashtirmoqda.
ABB 7–10 kundan keyin Davr Bank’ning asosiy aktsioneriga aylanadi
Ozarbayjonning ABB Bank’i yaqin 7–10 kun ichida Davr Bank aktsiyalariga boʻlgan huquqlarning yuridik topshirilishini yakunlaydi va uning asosiy aktsioneriga aylanadi, yangi ABB Davr brendi ostida ish boshlashi esa taxminan 2026 yilning oktyabr oyida kutilmoqda. Bu haqda bank saytida joylashtirilgan intervyuda ABB Boshqaruvi raisi Abbas Ibragimov maʼlum qildi.
Ibragimovning soʻzlariga koʻra, ABB Davr loyihasiga rasmiy start 23 avgust kuni Ozarbayjon va Oʻzbekiston prezidentlari Ilhom Aliyev va Shavkat Mirziyoyev ishtirokida berilgan edi. Oʻsha paytga kelib tomonlar barcha zarur ruxsatnomalarni olib boʻlgan va aktsiyalarni oldi-sotdi shartnomasini imzolagan edilar. Roʻyxatdan oʻtish tartib-taomillari yakunlanib, aktsiyadorlar reyestriga oʻzgartirishlar kiritilgandan soʻng, bank ABB nazoratiga oʻtadi.
Rebrending bosqichma-bosqich amalga oshiriladi: avval oʻzgarishlar korporativ kommunikatsiyalar va raqamli kanallarga, keyin esa filiallar, bankomatlar va kartalarga daxl qiladi. Ibragimov loyihaning vazifasi faqat nomni oʻzgartirish bilan cheklanib qolmasligini — bank Oʻzbekistonga ABB texnologiyalari, xizmat koʻrsatish standartlari va institutsional tajribasini mahalliy bozorga moslashtirgan holda olib kirish niyatida ekanligini aniqlashtirdi.
Loyiha asosiga aylangan Davr Bank hozirda 2 milliondan ortiq mijozga xizmat koʻrsatadi, 43 ta filial va xizmat koʻrsatish markazlari tarmogʻiga hamda 1800 dan ortiq xodimlar shtatiga ega. Bank aktivlari hajmi 2 milliard manatdan oshadi.
ABB rahbarining soʻzlariga koʻra, Oʻzbekiston bozoriga chiqish uchun platforma tanlashda kompaniya bankning rivojlanish dinamikasi, uning xalqaro aloqalari va mijozlar segmentlariga eʼtibor qaratgan.
ABB Davr’ni jismoniy shaxslar, kichik va oʻrta biznes, shuningdek, korporativ mijozlar uchun raqamli banking, toʻlovlar va hujjatli operatsiyalarga urgʻu bergan holda universal bank sifatida rivojlantirish rejalashtirilgan. Ibragimov bank, shuningdek, ABB tomonidan Ozarbayjonda muvaffaqiyatli amalga oshirilgan Beyond Banking modelini Oʻzbekiston bozoriga moslashtirish niyatida ekanligini taʼkidladi.
Loyihaning ikki tomonlama iqtisodiy aloqalar uchun ahamiyati haqida gapirar ekan, Ibragimov Oʻzbekistonda Ozarbayjon kapitali ishtirokidagi 470 dan ortiq, Ozarbayjonda esa Oʻzbekiston kapitali ishtirokidagi 130 dan ortiq korxona roʻyxatga olinganini eslatib oʻtdi. Uning soʻzlariga koʻra, ABB Davr hisob-kitoblar, savdoni moliyalashtirish va hujjatli operatsiyalar hisobiga ushbu biznes-ekotizim uchun moliyaviy koʻprikka aylanishi mumkin.
ABB guruhi uchun ushbu bitim 2026–2028 yillarga moʻljallangan geografik kengayish strategiyasi doirasidagi birinchi qadam boʻladi. U yakunlangach, guruhning mijozlar bazasi taxminan 5,5 million kishigacha, potentsial auditoriyasi esa 10 milliondan 50 milliongacha oshadi.