ABB Davr Bank’dagi ulushni sotib olishni yakunladi
ABB Davr Bank’dagi ulushni sotib olish jarayonini yakunladi.
Ozarbayjonning eng yirik davlat banki bo‘lmish ABB O‘zbekistondagi Davr Bank’ni xususiylashtirishni yakunladi. Bu haqda Ozarbayjon prezidenti Ilhom Aliyev va O‘zbekiston prezidenti Shavkat Mirziyoyevning davlat tashrifi chog‘ida namoyish etilgan qo‘shma loyihalar haqidagi videolavhada ma’lum qilindi.
Videolavhada shunday deyiladi: “Moliya sohasida Ozarbayjon Xalqaro banki Davr Bank’dagi ulushni sotib olishni yakunladi. Bu ikki mamlakatning bank sohasidagi hamkorligida yangi bosqichni boshlab beradi”.
23-avgust kuni ikki davlat prezidentlari O‘zbekistonda Ozarbayjon investitsiya loyihalarining ochilishi va ularga tamal toshi qo‘yilishiga bag‘ishlangan onlayn marosimda ishtirok etgan edi. Davr Bank ochilgan uchta loyihadan biri bo‘ldi.
Ilhom Aliyev OAV vakillari bilan uchrashuvda ikki tomonlama bank sohasidagi hamkorlik haqida gapirib, Ozarbayjonning yetakchi banki O‘zbekiston bozoriga kirganini ta’kidladi.
22-avgust kuni Ozarbayjon iqtisodiyot vaziri Mikayil Jabborov Toshkentda bo‘lib o‘tgan O‘zbekiston va Ozarbayjon hududlari IV forumida ABB’ning O‘zbekiston bank bozoriga kirishini ma’lum qilgan edi.
Ozarbayjon vaziri shunday degan: “Bugun Ozarbayjon va butun Janubiy Kavkaz mintaqasining eng yirik banki — ABB bilan shartnoma imzolanadi. Ushbu kelishuv bankning hamkorlik va Davr Bank’dagi ulushni sotib olish orqali O‘zbekiston bozoriga kirib kelishini anglatadi”.
Ozarbayjon ABB banki Davr Bank’ning 51 foiz ulushini sotib olmoqchiligi haqida 2026-yil may oyida ma’lum bo‘lgan edi. Iyun oyida Davr Bank aksiyadorlari ABB bilan bank aksiyalarining 51 foizini sotish bo‘yicha ehtimoliy kelishuv yuzasidan muzokaralarni davom ettirishni ma’qullagan edi.
Korxonalar va tashkilotlarning yagona davlat reyestri ma’lumotlariga ko‘ra, Davr Bank xususiy aksiyadorlik tijorat banki 2001-yil 29-sentyabrda davlat ro‘yxatidan o‘tgan bo‘lib, uning ustav fondi 500 mlrd so‘mni tashkil etadi.
Ozarbayjon xalqaro banki — ABB 1992-yil 10-yanvarda aksiyadorlik tijorat banki sifatida faoliyatini boshlagan. Bankning bosh ofisi Boku shahrida joylashgan bo‘lib, u Janubiy Kavkaz mintaqasidagi yirik banklardan biri hisoblanadi.