ABB O‘zbekistonda Davr Bank bilan qo‘shma loyihani boshladi
Ozarbayjonning ABB banki Davr Bank aksiyalarining nazorat paketini sotib olib, O‘zbekistonda ABB Davr brendi ostida ishlashni rejalashtirmoqda.
ABB O‘zbekistonda Davr Bank bilan hamkorlikda yangi loyihani ishga tushirdi.
23-avgust kuni Toshkentda O‘zbekiston va Ozarbayjon prezidentlari Shavkat Mirziyoyev va Ilhom Aliyev ishtirokida onlayn tarzda ABB Davr loyihasining rasmiy ochilish marosimi bo‘lib o‘tdi. Ushbu loyiha Ozarbayjonning ABB banki tomonidan O‘zbekistondagi Davr Bank aksiyalarining nazorat paketini sotib olishni va bankning mamlakat bozorida "ABB Davr" brendi ostida faoliyatini davom ettirishini nazarda tutadi. Bu haqda ABB xabar berdi.
Marosim Ozarbayjon tomonidan O‘zbekistonda amalga oshirilayotgan loyihalarni ochish va ularga tamal toshi qo‘yishga bag‘ishlangan tadbir doirasida o‘tkazildi. Ilhom Aliyev ushbu loyihaning ishga tushirilishini Ozarbayjonning yetakchi banklaridan birining O‘zbekiston bozoriga kirib kelishi sifatida baholadi.
Davr Bank aksiyalarining nazorat paketini sotib olish bo‘yicha kelishuv 22-avgust kuni Toshkentda bo‘lib o‘tgan IV O‘zbekiston–Ozarbayjon mintaqalararo forumi doirasida ABB boshqaruv raisi Abbos Ibrohimov va Davr Bank aksiyadori hamda Kuzatuv kengashi raisi Lutfulla Ubayev tomonidan imzolangan edi.
Ma’lumotlarga ko‘ra, barcha zarur tartibga soluvchi ruxsatnomalar olingan va tegishli kelishuvlar imzolangan. Bitimni yakunlash tranzaksiya bo‘yicha yakuniy hisob-kitoblarga bog‘liq.
O‘zbekiston bozoriga kirish ABBning 2026–2028 yillarga mo‘ljallangan bankni rivojlantirish strategik rejasida belgilangan geografik kengayish maqsadiga mos keladi. Bank "ABB Davr" brendi ostida mamlakatning barcha hududlarida korporativ va chakana mijozlarga keng turdagi moliyaviy xizmatlarni taqdim etishni rejalashtirmoqda.
ABB moliyaviy guruhi O‘zbekistonda korporativ boshqaruv va raqamli transformatsiya sohasidagi o‘z tajribalarini, shuningdek, sun’iy intellektga asoslangan yechimlarni joriy etishni rejalashtirmoqda. Kichik va o‘rta biznes uchun kompleks moliyaviy xizmatlarga alohida e’tibor qaratiladi.
ABB kompaniyasi O‘zbekiston bozoridagi faoliyat guruhni rivojlantirish uchun qo‘shimcha imkoniyatlar yaratadi, deb hisoblamoqda. Kompaniya, shuningdek, kichik va o‘rta biznes imkoniyatlarini kengaytirish hamda bank xizmatlari sohasida zamonaviy mijoz tajribasini shakllantirishga hissa qo‘shishni rejalashtirmoqda.
ABB boshqaruv raisi Abbos Ibrohimov ushbu loyihani guruhning O‘zbekistondagi uzoq muddatli faoliyatining boshlanishi deb atadi. Uning so‘zlariga ko‘ra, bank biznes, fuqarolar va mamlakat iqtisodiyoti uchun moliyaviy hamkor bo‘lish, yangi imkoniyatlar yaratish hamda Ozarbayjon va O‘zbekiston o‘rtasidagi hamkorlikni yanada rivojlantirishni qo‘llab-quvvatlashni maqsad qilgan.
Lutfulla Ubayev mazkur bitim Davr Bank bank xizmatlari sifatini oshirish imkonini berishini ta’kidladi. Uning qayd etishicha, yangi hamkorning tajribasi, innovatsion texnologiyalari va kapitali bankka qisqa muddat ichida mijozlarga zamonaviy moliyaviy mahsulotlarni taklif etish imkonini berishi kerak.
ABB, shuningdek, O‘zbekiston bozoridagi ishtirok moliyaviy guruhning mintaqaviy va xalqaro mavqelarini mustahkamlashga xizmat qiladi, deb hisoblamoqda.