2030 yildan boshlab Oʻzbekistonda tibbiyot xodimlari davlat roʻyxatidan oʻtishga majbur boʻladilar
Oʻzbekistonda tibbiyot xodimlarini kasbga yoʻllash tartibini oʻzgartirish kutilmoqda. Diplomdan tashqari, bilimlarni mustaqil baholashdan oʻtish va davlat roʻyxatidan oʻtish talab etiladi. 2027 yildan 2030 yilgacha tizim ixtiyoriy, 2030 yildan boshlab esa majburiy boʻladi.
2030 yildan boshlab Oʻzbekistonda tibbiyot xodimlari davlat roʻyxatidan oʻtishga majbur boʻladilar
Oʻzbekistonda tibbiyot va farmatsevtika xodimlarini davlat roʻyxatidan oʻtkazishni joriy etish rejalashtirilmoqda. Bu haqda 4 sentyabr kuni Prezident huzurida boʻlib oʻtgan taqdimotda soʻz bordi.
2027 yildan 2030 yilgacha roʻyxatdan oʻtishni ixtiyoriy, 2030 yildan boshlab esa majburiy qilish taklif etilmoqda. Kelgusida roʻyxatdan oʻtmagan mutaxassislar tibbiy yoki farmatsevtik faoliyat bilan shugʻullana olmaydilar.
Buning uchun tibbiyot va farmatsevtika sohasi xodimlarining yagona elektron reyestrini shakllantirish va uni 16 ta axborot bazasi bilan bogʻlash rejalashtirilgan. Reyestrda mutaxassislarning maʼlumoti, malakasi va kasbiy faoliyati toʻgʻrisidagi maʼlumotlar jamlanadi.
Tibbiyot va farmatsevtika xodimlarining malakasini baholash markazi direktori Sanjar Sharipovning maʼlum qilishicha, gap taxminan 600 ming nafar mutaxassis haqida bormoqda. «Ularning yagona reyestrini yaratish hamda uning ochiqligi va shaffofligini taʼminlash koʻzda tutilmoqda», — dedi u.
Roʻyxatdan oʻtish bilim va kasbiy tayyorgarlikni mustaqil baholash bilan bogʻliq boʻladi. Imtihonlarni bir necha bosqichda — oʻqish davrida, asosiy dastur yakunlanganidan keyin va rezidenturadan soʻng oʻtkazish rejalashtirilmoqda.
Sogʻliqni saqlash vaziri oʻrinbosari Adham Xudayqulov diplomning oʻzi endi mustaqil klinik ishga avtomatik ravishda ruxsat berishni anglatmasligini taʼkidladi.
«Mustaqil baholash tizimi paydo boʻladi va shifokor boʻlib ishlash faqat roʻyxatdan oʻtgandan keyingina mumkin boʻladi», — dedi u.
Uning soʻzlariga koʻra, birinchi mustaqil baholashni oʻqish jarayonidayoq, keyingisini — bitiruvchiga shifokor boʻlib ishlashga ruxsat berishdan oldin, rezidenturadan keyin esa mutaxassis tor ixtisoslik boʻyicha ishlash uchun yana bir baholashdan oʻtishi kerak boʻladi.
Toshkent davlat tibbiyot universiteti rektori Shuhrat Boymurodov tizim uch bosqichli boʻlishiga aniqlik kiritdi.
«Ikkinchi-uchinchi kurslar yakunlanganidan keyin talabalar fundamental fanlardan imtihon topshiradilar. Bitiruv kursi tamomlangandan soʻng ikkinchi bosqich (mutaxassislik boʻyicha — tahr.), rezidentura yakunlanganidan keyin esa uchinchi bosqich koʻzda tutilgan», — dedi u.
Baholash uchun yagona testlar va topshiriqlar banki, shuningdek, simulyatsion bazalar yaratish rejalashtirilgan. Imtihondan oʻta olmaganlarga qayta topshirish imkoniyati beriladi.
Majburiy roʻyxatdan oʻtish joriy etilgunga qadar tizimga ixtiyoriy ravishda qoʻshiladigan mutaxassislar uchun moliyaviy ragʻbatlar koʻzda tutilgan.
Imtihonni muvaffaqiyatli topshirgan va davlat reyestriga kiritilgan oliy maʼlumotli shifokorlar va farmatsevtlarga mehnatga haq toʻlashning eng kam miqdorining (MHEKM) 5 baravarigacha (6,8 mln soʻm) ustama toʻlash taklif etilmoqda. Oʻrta tibbiyot va farmatsevtika xodimlari uchun — MHEKMning 2,5 baravarigacha (3,4 mln soʻm).
Uzluksiz kasbiy taʼlim natijalari ham roʻyxatdan oʻtish va malakani tasdiqlashda hisobga olinadi.
Sanjar Sharipovning soʻzlariga koʻra, yangi tizim tibbiy yordam sifati va xavfsizligini nazorat qilishning qoʻshimcha mexanizmiga aylanishi kerak.
«Tibbiyot va farmatsevtika xodimlarini xalqaro standartlarga muvofiq davlat roʻyxatidan oʻtkazish, shuningdek, shaffof mezonlar asosida ularning kasbiy malakasini mustaqil baholash tizimini joriy etish koʻzda tutilmoqda», — dedi u.
Davlat roʻyxatidan oʻtkazish va malakani baholashni tashkil etish uchun alohida markaz tashkil etish rejalashtirilgan.
Prezident yangi qoidalarni bosqichma-bosqich joriy etish hamda kadrlar tayyorlash, mustaqil baholash, davlat roʻyxatidan oʻtkazish va malakani doimiy oshirishni yagona tizimga birlashtirish boʻyicha topshiriq berdi.
Alohida ravishda, sogʻliqni saqlash vaziri Eldor Adilov taqdimotda Prezident 2026 yil yakuniga qadar tibbiy sugʻurta tizimini butun mamlakat boʻylab kengaytirish, xarid qilinadigan dori-darmonlar va sarflash materiallarining bemorlarga yetib borishini taʼminlash hamda sogʻliqni saqlash tizimida korruptsiyaning oldini olish boʻyicha ishlarni kuchaytirishni topshirganini maʼlum qildi. U, shuningdek, xorijda ishlayotgan vatandosh tibbiyot mutaxassislarini Oʻzbekistonga jalb qilish uchun ragʻbatlantirish choralarini ishlab chiqishni topshirdi.
Oʻzbekistonda shifokorlarni tayyorlash tizimini ham oʻzgartirish rejalashtirilmoqda: 2027/2028 oʻquv yilidan boshlab «Davolash ishi» yoʻnalishini olti yillik «Umumiy tibbiyot» dasturiga almashtirish taklif etilmoqda. Oʻqish 5+1 modeli boʻyicha tashkil etiladi — besh yil tayyorgarlik va bir toʻliq yil amaliyot.