UEFA Janni Infantinodan iste’foga chiqishni talab qildi

UEFA Janni Infantinoning iste'fosini talab qilmoqda

Yevropa futbol assotsiatsiyalari ittifoqi (UEFA) FIFA prezidenti Janni Infantinoga iste'foga chiqishni talab qilib, ultimatum qo'ydi. Aks holda, unga nisbatan ishonchsizlik votumi e'lon qilinishi mumkin. Bu haqda The Telegraph nashri xabar berdi.

Ingliz gazetasining ma'lumotlariga ko'ra, agar Infantino iste'foga chiqishdan bosh tortsa, UEFAga a'zo barcha 55 ta davlat uni ishonchsizlik ovozi orqali lavozimidan chetlatishga tayyor. UEFA bu jarayonni FIFAning 211 ta a'zo davlatidan 43 tasining ovozi bilan boshlashi mumkin.

28-iyul kuni FIFAning Jahon chempionati tijorat huquqlari ulushini sotish rejalari e'lon qilingan edi. FIFA 20 milliard dollarlik FIFA Forward Enterprise sho''ba korxonasini tashkil etishni va uning chorak qismini tashqi investorlarga 4,2 milliard dollarga sotishni rejalashtirgan edi. Bu rejalar sport hamjamiyatida jiddiy tanqidlarga sabab bo'ldi. UEFA va uning barcha 55 ta a'zo milliy federatsiyalari FIFA homiyligidagi musobaqalarni boykot qilishini e'lon qilishdi.

1-avgust kuni FIFA Jahon chempionati tijorat huquqlari ulushini sotish rejasidan voz kechdi. Shundan so'ng, Yevropa futbol assotsiatsiyalari ittifoqi FIFAning hozirgi rahbariyati "nafaqat UEFA, balki futbol oilasining boshqa ko'plab a'zolarining ham ishonchini yo'qotganini" ma'lum qildi.

Infantino 2016-yildan beri FIFA prezidenti lavozimida ishlab kelmoqda. Avvalroq u kelasi yilning mart oyida bo'ladigan saylovda qatnashish istagini bildirgan edi.