Tomoshabinlar tanlovi: IMDb tarixidagi eng yaxshi 25 film
IMDb foydalanuvchilari baholari asosida tuzilgan reytingga ko‘ra, «Shoushenkdan qochish» (The Shawshank Redemption) yana dunyodagi eng yuqori baholangan film sifatida qolmoqda. Reyting shuningdek, so‘nggi o‘n yilliklarda tomoshabinlar orasida eng katta e’tirofga sazovor bo‘lgan kartinalar va kino sanoatidagi tendensiyalarni ham aks ettirgan.
**Tomoshabinlar tanlovi: IMDb tarixidagi eng yaxshi 25 film**
Dunyoning eng yirik kino ma'lumotlar bazalaridan biri bo'lgan IMDb, foydalanuvchilarning baholari asosida tuzilgan eng yuqori reytingga ega 25 ta filmni e'lon qildi. Ushbu ro'yxat millionlab tomoshabinlarning 10 ballik tizimda bergan baholariga tayanadi va yangi ovozlar qo'shilishi bilan doimiy ravishda yangilanib turadi.
Reyting deyarli 80 yillik jahon kinematografiyasini qamrab olgan bo'lsa-da, eng yaxshi 25 filmning qariyb yarmi 1990-yillarda suratga olingan. Bu davrda yaratilgan "Shoushenkdan qochish" (9,3), "Shindler ro'yxati" (9,0), "Forrest Gamp" (8,8) va "Yaxshi yigitlar" (Goodfellas, 8,7) kabi filmlar bugungacha eng yuqori baholangan asarlar qatorida qolmoqda. Shuningdek, 1990-yillarda ekranlarga chiqqan "Qo'zilar sukuti" (1991), "Rayanni qutqarish" (1998) va "Yashil milya" (1999) filmlari ham 8,6 ball bilan eng yaxshi filmlar ro'yxatidan joy olgan.
Reytingda zamonaviy filmlar ustunlik qilsa-da, klassik kinolar ham yuqori o'rinlarni saqlab qolgan. Top-25 orasidagi eng qadimiy film - Frenk Kapraning 1946-yilda suratga olgan "Bu ajoyib hayot" filmi bo'lib, uning reytingi 8,6 ballni tashkil etadi. Shuningdek, Akira Kurosavaning "Yetti samuray" filmi ham xuddi shunday bahoga ega. 1957-yilda ekranga chiqqan "12 g'azablangan odam" sud dramasi IMDb reytingida oltinchi o'rinni egallagan. Uning reytingi 9,0 ballni tashkil etadi va u Gollivudning "oltin davri" filmlari orasida eng yuqori natijaga erishgan.
XXI asrda suratga olingan filmlardan faqat oltitasi top-25'ga kira olgan. Ularning uchtasini Piter Jyeksonning 2001–2003-yillarda suratga olgan "Uzuklar hukmdori" trilogiyasi tashkil etadi. Ushbu filmlarning o'rtacha reytingi 8,9 ballni tashkil qiladi. Qolgan uch film mashhur britan-amerikalik rejissyor Kristofer Nolanga tegishli. Uning "Qora ritsar" (The Dark Knight, 2008) filmi 9,1 ball bilan umumiy reytingda uchinchi o'rinni egallagan. Shuningdek, "Boshlanish" (Inception, 2010) 8,8 ball, "Interstellar" (Interstellar, 2014) esa 8,7 ball bilan eng yaxshi filmlar qatoriga kirgan.
Hozircha "Interstellar" IMDb top-25 reytingidagi eng yangi film hisoblanadi. Nashr ta'kidlashicha, undan keyin Kristofer Nolan "Oppengeymer" (2023) va "Odisseya" (2026) kabi yirik kinoloyihalarni taqdim etib, zamonaviy kinematografiyadagi yetakchi rejissyorlardan biri sifatidagi mavqeini yanada mustahkamlagan.