Shimoliy Koreya Ukrainaga qarshi urush uchun Rossiyada raketa bo‘linmasini joylashtirishni boshladi — Kiyev razvedkasi

Shimoliy Koreya Ukrainaga qarshi urushda foydalanish uchun Rossiyaning g‘arbiy hududlariga raketa bo‘linmasini joylashtirishni boshladi, deya xabar berdi Kiyev razvedka xizmati. Ushbu bo‘linma tarkibida 120 ta ballistik raketa va oltita uchirish qurilmasi bo‘lishi mumkin.

Ukrainada zamonaviy havo hujumidan mudofaa tizimlari yetishmayotgan bir paytda, Rossiya urib tushirish qiyin bo‘lgan ballistik raketalardan ko‘proq foydalanishga intilmoqda. Rossiya 2023-yil oxiridan beri Ukrainaga o‘nlab Shimoliy Koreya ballistik raketalarini uchirgan. Shimoliy Koreya raketa kuchlarining joylashtirilishi Moskva va Pxenyan o‘rtasidagi harbiy hamkorlikning yanada kengayganidan dalolat beradi.

Ukraina Mudofaa vazirligi Bosh razvedka boshqarmasi vakili Andriy Chernyakning so‘zlariga ko‘ra, Rossiya 90 nafarga yaqin Shimoliy Koreya harbiylaridan iborat raketa bo‘linmasini Rossiyaning Voronej viloyatidagi 112-raketa brigadasi tarkibiga qo‘shishni rejalashtirgan. Pxenyan Rossiyaga 40 ta yangi KN-23 va KN-24 raketalari hamda harbiylarni yuborgani ta’kidlanmoqda. Biroq, harbiylarning aniq joylashuvi va raketalarning umumiy soni kelasi oyda bo‘lib o‘tadigan yuqori darajadagi muzokaralarda uzil-kesil hal qilinadi.

Rossiya ushbu joylashtirish 120 ta Shimoliy Koreya ballistik raketasi va oltita uchirish qurilmasini o‘z ichiga olishini kutmoqda. Shimoliy Koreya harbiylarining Rossiya raketa operatsiyalarida qanday rol o‘ynashi hozircha noma’lum.

O‘tgan haftada Rossiya 2025-yil avgustdan beri ilk bor Ukrainaga Shimoliy Koreyaning ikkita raketasini uchirdi. Ushbu hujum natijasida bir oilaning kamida olti nafar aʼzosi va yana bir kishi halok bo‘lgan.

Filadelfiyadagi Tashqi siyosat tadqiqotlari instituti katta ilmiy xodimi Rob Lining ta’kidlashicha, Shimoliy Koreya resurslari Kiyev uchun jiddiy xavf tug‘diradi. "Ballistik raketalardan himoyalanish Ukrainaning eng zaif nuqtalaridan biridir. Shuning uchun raketalar sonining har qanday oshishi katta qiyinchilik tug‘diradi", dedi u. Ekspertning qo‘shimcha qilishicha, 2026-yil qishda havo hujumidan mudofaa tizimlarining holati Ukraina uchun alohida xavotir uyg‘otadi, chunki Rossiya o‘tgan yillardagidek yana energetika tizimiga kuchli zarbalar berishi mumkin.

Rossiya Mudofaa vazirligi va Shimoliy Koreyaning Nyu-Yorkdagi BMT vakolatxonasi yozma so‘rovlarga darhol javob bermadi. Shimoliy Koreya Moskvaning 2022-yilda Ukrainaga bostirib kirishidan so‘ng Rossiyaning yaqin ittifoqchisiga aylandi. Ikki mamlakat 2024-yilda o‘zaro mudofaa shartnomasini imzoladi.

Ukraina rasmiylariga ko‘ra, Pxenyan Rossiya armiyasiga millionlab artilleriya snaryadlarini yetkazib bergan. Shuningdek, 2024-yilda Ukraina qurolli kuchlarining hujumini qaytarish uchun Rossiyaning Kursk viloyatiga 14 000 nafar askar yuborgan.

Ukraina harbiy manbalariga ko‘ra, Shimoliy Koreyaning KN-23 va KN-24 raketalari Rossiyaning Iskander analogiga qaraganda uzoqroqqa uchadi va ko‘proq yuk ko‘taradi. Biroq, ularning aniqligi juda past va ular ko‘plab tinch aholining o‘limiga sabab bo‘lgan zarbalarda qo‘llanilgan.

Rossiya Ukrainaga KN-23 va KN-24 raketalarini 2023-yil oxiridan uchira boshlagan. Chernyakning so‘zlariga ko‘ra, Shimoliy Koreya 2023-yil oxiridan 2025-yil avgustigacha 150 ta shunday raketa yetkazib bergan. Uning bildirishicha, Rossiyaning Ukraina bilan chegaradosh Kursk viloyatida 9500 ga yaqin Shimoliy Koreya askari bor, ammo ular hozircha Ukrainaga qarshi harbiy operatsiyalarda bevosita qatnashmayapti.

Zelenskiy iyun oyida Kreml Shimoliy Koreyadan yana 30 000 nafar askar yuborishini xohlayotganini va Rossiya ularni Voronej viloyatida qabul qilishga tayyorgarlik ko‘rayotganini aytgan edi.