O‘zbekiston va Qozog‘iston 10-avgustdan bir qator tovarlar uchun savdodagi to‘siqlarni bekor qiladi

O‘zbekiston va Qozog‘iston 10-avgustdan boshlab bir qator mahsulotlar uchun savdo cheklovlarini bekor qiladi. Bu haqda 5-avgust kuni Toshkentda bo‘lib o‘tgan O‘zbekiston-Qozog‘iston biznes-forumida ma’lum qilindi.

O‘zbekiston Savdo-sanoat palatasining "Gazeta"ga xabar berishicha, bu qaror qishloq xo‘jaligi va oziq-ovqat mahsulotlari, to‘qimachilik, qurilish materiallari, mashinalar, elektrotexnika mahsulotlari, mebel va boshqa tovarlarni o‘z ichiga oladi.

Forumda ta’kidlanishicha, savdodagi cheklovlar yaqinda Aqtau shahrida ikki mamlakat bosh vazirlari ishtirokida o‘tkazilgan O‘zbekiston-Qozog‘iston hukumatlararo komissiyasi yig‘ilishida muhokama qilingan. Muzokaralar natijasida tomonlar biznes hamjamiyati ilgari ko‘targan to‘siqlar bo‘yicha qarorlar qabul qilgan.

Savdo-sanoat palatasi raisi Davron Vahobovning so‘zlariga ko‘ra, "Biznes bu haqda anchadan beri gapirayotgan edi – bu muammo edi... Bir hafta avval 10-avgustdan boshlab o‘rnatilgan barcha tarif va notarif to‘siqlar bekor qilinishi ma’lum qilindi. Bu ikki mamlakat tadbirkorlari uchun katta turtki bo‘lishiga ishonamiz".

Qozog‘istonning O‘zbekistondagi elchisi Yerlan Turgumbayevning ma’lum qilishicha, qabul qilingan qarorlar qariyb 20 turdagi mahsulotlarga taalluqli. Uning ta’kidlashicha, "Bugungi kunda o‘zaro munosabatlarimiz juda yuqori sur’atlarda rivojlanmoqda. Albatta, bu davlatlarimiz rahbarlari o‘rtasidagi ishonchli, birodarona munosabatlar bilan bog‘liq... Qariyb 20 turdagi tovar bo‘yicha bir hafta ichida to‘siqlar olib tashlandi. Menimcha, bunday tezkor qarorlar ilgari bo‘lmagan".

Elchining so‘zlariga ko‘ra, Qozog‘istonda ham O‘zbekistonga 261 ta tovar pozitsiyasi bo‘yicha yetkazib berish hajmini oshirish imkoniyatlari mavjud.

Savdo-sanoat palatasi ma’lumotlariga ko‘ra, quyidagi tovar guruhlari uchun cheklovlar bekor qilinadi:

* 07: Yangi va sovitilgan sabzavotlar

* 08: Mevalar, rezavorlar va poliz mahsulotlari

* 10: Donli ekinlarning ayrim turlari

* 11: Donni qayta ishlash mahsulotlari

* 17: Shakar va qandolat mahsulotlari

* 19: Dondan tayyorlangan mahsulotlar

* 20: Qayta ishlangan sabzavot va mevalar

* 22: Alkogolsiz ichimliklar

* 39: Plastmassa buyumlari

* 52: Paxta va paxta tolasi

* 54−63: To‘qimachilik mahsulotlari, matolar, kiyim-kechak va trikotaj

* 68: Qurilish materiallari

* 69: Keramika mahsulotlari

* 70: Shisha va shisha buyumlari

* 73: Metall konstruksiyalar va qora metallardan tayyorlangan buyumlar

* 84: Mashina va uskunalar

* 85: Elektrotexnika mahsulotlari

* 87: Avtokomponentlarning ayrim turlari

* 94: Mebel

Savdo-sanoat palatasi har bir tovar guruhi bo‘yicha aynan qanday cheklovlar amal qilgani va ularning ikki mamlakat tomonidan bir vaqtning o‘zida bekor qilinishi yoki qilinmasligiga aniqlik kiritmadi.

Qozog‘istonning "Atameken" Milliy tadbirkorlar palatasi prezidiumi raisi Kanat Sharlapayev o‘zaro savdodagi to‘siqlarni bartaraf etish ishlarini doimiy formatga o‘tkazish zarurligini ta’kidladi. Uning so‘zlariga ko‘ra, "Logistikadagi ziddiyatlar hal qilinishi lozim bo‘lgan yo‘nalishlar bor. Chegarada ham, o‘zingiz bilasiz, muammolar mavjud – buni inkor etmaymiz, ularni hal qilish kerak. Bu uzoq muddatli hamkorlikning boshlanishi".

2025-yil yakunlariga ko‘ra, O‘zbekiston va Qozog‘iston o‘rtasidagi o‘zaro tovar ayirboshlash hajmi 11 foizga o‘sib, qariyb 5 mlrd dollarga yetgan. Ikki mamlakat prezidentlari tovar ayirboshlash hajmini 10 mlrd dollarga yetkazish vazifasini qo‘ygan.

Kanat Sharlapayevning fikricha, "10 mlrd dollarlik ko‘rsatkich 5 mln dollarlik shartnoma, 1 mln dollarlik shartnoma va har kunlik mehnatdan shakllanadi. Biz 10 mlrd dollarlik tovar ayirboshlashga siyosiy bayonotlar orqali emas, balki mamlakatlarimiz o‘rtasidagi har kunlik ish orqali erishishimiz kerak".

Eslatib o‘tamiz, 2024-yil yanvar oyida O‘zbekiston va Qozog‘iston ikki tomonlama savdodagi to‘siqlarni bartaraf etish bo‘yicha ishchi guruh tuzishga kelishib olgan edi.