O‘zbekiston JSTga yaqinlashmoqda, YPX xodimining o‘limi va 1 mlrdlik talon-toroj - mahalliy dayjyest

O‘zbekiston JSTga intilmoqda, YPX xodimining fojiali o‘limi va 1 milliard so‘mlik talon-toroj – Kun.uz dayjyesti

O‘zbekiston 2026-yilga qadar Jahon savdo tashkilotiga a’zo bo‘lish niyatini yana bir bor tasdiqladi. Farg‘onada mast haydovchi YPX xodimini urib yuborishi oqibatida u halok bo‘ldi. Qoraqalpog‘istonda esa 1 milliard so‘mlik gazballonlar o‘zlashtirilgani aniqlandi. Kun.uz dayjyestida shu va boshqa muhim mahalliy yangiliklar bilan tanishing.

**O‘zbekiston JSTga 2026-yilda qo‘shilish maqsadini tasdiqladi**

O‘zbekiston Jahon savdo tashkilotiga a’zo bo‘lish jarayonini 2026-yilda yakunlash rejasini o‘z kuchida qolishini ma’lum qildi. JST Ishchi guruhining navbatdagi yig‘ilishida mamlakat tomonidan qabul qilingan 190 ta normativ-huquqiy hujjat, ikki tomonlama muzokaralar va amalga oshirilayotgan iqtisodiy islohotlar muhokama qilindi. Hozirga qadar O‘zbekiston 31 ta bozorga kirish bo‘yicha ikki tomonlama kelishuv imzolagan. JST rahbariyati muzokaralardagi ilgarilashni ijobiy baholadi.

**Mast haydovchi YPX xodimining o‘limiga sabab bo‘ldi**

Farg‘ona viloyatining O‘zbekiston tumanida xizmat vazifasini bajarayotgan YPX inspektori Hayitbek Karimjonov avtomobil urib ketishi oqibatida halok bo‘ldi. Hodisa 31-iyul kuni kechasi sodir bo‘lgan. Guvohlar Spark haydovchisi mast holatda bo‘lgani va to‘xtash ishorasiga bo‘ysunmasdan qochganini aytmoqda. Holat yuzasidan tergov harakatlari olib borilmoqda.

**1067 ta gazballon talon-toroj qilindi**

Qoraqalpog‘iston Respublikasining Taxtako‘pir tumanida qiymati 1 milliard so‘mlik 1067 dona suyultirilgan gazballon talon-toroj qilingani aniqlandi. Tergov ma’lumotlariga ko‘ra, gazballonlar «Taxtako‘pirtumangaz» ta’minoti bo‘limi moddiy javobgar shaxslari tomonidan o‘zlashtirilgan. Holat yuzasidan Jinoyat kodeksining 167-moddasi, ya’ni o‘zlashtirish yoki rastrata yo‘li bilan talon-toroj qilish bilan jinoyat ishi qo‘zg‘atilib, tergov harakatlari olib borilmoqda.

**Chexiyaga ishga yuborish uchun hamshiralar o‘qitiladi**

O‘zbekiston va Chexiya tibbiyot xodimlarini tartibga solingan mehnat migratsiyasi asosida ishga joylashtirish bo‘yicha hamkorlikni kengaytirishni rejalashtirmoqda. Shu maqsadda Chexiyada ishlash istagidagi o‘zbekistonlik hamshiralar uchun mamlakatimizda maxsus o‘quv kurslarini tashkil etish imkoniyati ko‘rib chiqilmoqda. Tomonlar malakali mutaxassislarni Chexiyaga qonuniy va tartibli ishga joylashtirish hamda bu sohadagi hamkorlikni rivojlantirish masalalarini muhokama qildi.

**Nukusda yangi energiya tizimi ishga tushiriladi**

Prezident qaroriga muvofiq, Nukus shahridagi «RK-1» qozonxonasi davlat-xususiy sheriklik asosida kogeneratsiya texnologiyalari bilan modernizatsiya qilinadi. Loyiha doirasida bir vaqtning o‘zida elektr va issiqlik energiyasi ishlab chiqarish yo‘lga qo‘yiladi. Bu energiya tejamkorligini oshirish, tabiiy gaz sarfini kamaytirish va issiqlik ta’minoti sifatini yaxshilashga xizmat qiladi. Shuningdek, 28 kilometr issiqlik tarmoqlari qurilib, minglab aholi barqaror elektr va markazlashgan issiqlik ta’minoti bilan qamrab olinadi.

**Imtihonga kelmagan talabgorlar pulini qaytarib olishi mumkin**

Bilim va malakalarni baholash agentligi milliy sertifikat imtihonlarida ishtirok eta olmagan talabgorlar uchun yangi tartibni joriy qildi. Endi uzrli sabab bilan imtihonga kelmaganlar to‘lagan mablag‘ini qaytarib olishi yoki keyingi imtihonda qo‘shimcha to‘lovsiz ishtirok etishi mumkin. Bu imkoniyat kasallik, xizmat safari yoki yaqin qarindoshining vafoti kabi holatlarda qo‘llanadi. Uzrsiz kelmagan yoki imtihon qoidalarini buzgan talabgorlar esa ushbu tartibdan foydalana olmaydi.

**Ta’lim muassasalarida xavfsizlik choralari kuchaytiriladi**

Vazirlar Mahkamasi qarori bilan maktablar, oliygohlar va boshqa ta’lim muassasalarida xavfsizlik tizimini takomillashtirish bo‘yicha yangi tartib tasdiqlandi. Unga ko‘ra, muassasalarda videokuzatuv, kirish-chiqishni nazorat qilish, yong‘in xavfsizligi va favqulodda vaziyatlarda harakat qilish tizimlari bosqichma-bosqich modernizatsiya qilinadi. Shuningdek, qo‘riqlash xizmati xodimlarining malakasi oshirilib, axborot tizimlari «Xavfsiz ta’lim» platformasi bilan integratsiya qilinadi.

**Hayvonlarga shafqatsizlik uchun jazo og‘irlashdi**

Prezident administratsiyasi rahbari Saida Mirziyoyeva hayvonlarga nisbatan shafqatsiz munosabat uchun javobgarlik kuchaytirilganini eslatdi. Endi bunday huquqbuzarlik uchun ma’muriy jarimalar ikki baravar oshirilgan, shuningdek, 15 sutkagacha ma’muriy qamoq jazosi ham qo‘llanishi mumkin. Takroran sodir etilgan holatlar esa jinoiy javobgarlikka sabab bo‘ladi. Saida Mirziyoyeva bu kabi qonunlar jamiyatda mehr-oqibat va mas’uliyatli munosabatni shakllantirishga xizmat qilishini ta’kidladi.