Javohir Sindarov Sent Luisdagi ikkinchi o‘rindan so‘ng Grand Chess Tour finaliga yaqinlashdi

Javohir Sindarov Sent-Luisdagi ikkinchi o‘rin bilan Grand Chess Tour finaliga yaqinlashdi.

O‘zbekistonlik grossmeyster Javohir Sindarov Grand Chess Tour 2026 elit turnirlar seriyasining to‘rtinchi bosqichi bo‘lgan Saint Louis Rapid & Blitz musobaqasida ikkinchi o‘rinni egalladi. U ham rapid, ham blitsda ikkinchi bo‘lib, jami 22 ochko to‘pladi.

2-6-avgust kunlari bo‘lib o‘tgan turnirda 9 ta rapid va 18 ta blits partiyasi o‘ynaldi. Rapidda g‘alaba uchun ikki ochko, durang uchun bir ochko berildi, blitsda esa g‘alaba uchun bir ochko va durang uchun yarim ochko berildi. Bosqichning umumiy mukofot jamg‘armasi 200 ming dollarni tashkil etdi.

**Foto:** Lennart Ootes / Grand Chess Tour

Rapidning to‘qqiz turi yakunlariga ko‘ra, Sindarov 11 ochko bilan ikkinchi o‘rinni egalladi. Hindistonlik Rameshbabu Pragnanandha 12 ochko, AQSh vakili Uesli So esa 10 ochko jamg‘argan.

Sindarovning rapiddagi performansi 2739 ni tashkil etdi. Turnirning yakuniy jadvaliga ko‘ra, uning ushbu yo‘nalishdagi reytingi bosqich oldidan 2730 edi.

Blits bahslari boshlanishidan oldin o‘zbekistonlik shaxmatchi peshqadamdan atigi bir ochko ortda qolayotgandi.

Blitsning dastlabki to‘qqiz partiyasida Sindarov 5,5 ochko to‘plab, ikkinchi o‘rinni saqlab qoldi. To‘rtinchi turdan oltinchi turgacha bo‘lgan oraliq u uchun ayniqsa muvaffaqiyatli kechdi va u ketma-ket uchta g‘alabaga erishdi – Fabiano Karuana, Evonder Lyan va Lener Dominges ustidan zafar quchdi.

Blitsning birinchi kunidagi eng muhim partiyalardan biri Pragnanandhaga qarshi kechdi. Sindarov qo‘shimcha piyodani qo‘lga kiritdi va Chess.com bahosiga ko‘ra g‘alabali pozitsiyaga ega bo‘ldi, biroq piyodalar yakunida noaniqlikka yo‘l qo‘ydi, shundan so‘ng raqiblar durangga kelishdi. Agar u g‘alaba qozonganida, peshqadamdan farqni yarim ochkogacha qisqartirgan bo‘lardi.

“O‘yinning hal qiluvchi pallasida deyarli istalgan yurish bilan g‘alaba qozonayotganimni ko‘rgan edim”, – deb tushuntirdi keyinroq Sindarov partiyaning hal qiluvchi pallasidagi tanlovini izohlab.

Blitsning birinchi davrasidan keyin umumiy hisobda Pragnanandhaning 18 ochkosi, Sindarovning 16,5 ochkosi va Soning 15 ochkosi bor edi.

**Foto:** Lennart Ootes / Grand Chess Tour

Ikkinchi kuni Sindarov 9 ta imkoniyatdan yana 5,5 ochko to‘pladi. Levon Aronyan bilan durang o‘ynaganidan so‘ng u ketma-ket Yorden van Forest va Vinsent Kaymerni mag‘lub etdi. Shundan so‘ng Karuanadan mag‘lubiyatga uchradi, biroq keyinroq o‘zbekistonlik shaxmatchi Anish Girini mag‘lub etdi.

Yakun oldidan Pragnanandha bilan farq ayrim paytlarda yarim ochkogacha qisqardi.

Blitsning 17-turida peshqadamlar o‘zaro to‘qnash keldi. Sindarov qo‘shimcha piyodaga ega edi, ammo Pragnanandha pozitsiyani saqlab qoldi. Durang natija hindistonlik shaxmatchiga musobaqa tugashiga bir tur qolganida turnirda g‘oliblikni ta’minladi.

So‘nggi turda Sindarov Uesli So bilan durang o‘ynadi.

Blitsning barcha 18 ta partiyasi yakunlariga ko‘ra, Pragnanandha 11,5 ochko, Sindarov 11 ochko, So 10,5 ochko va Aronyan 10 ochko jamg‘ardi.

O‘zbekistonlik shaxmatchi blitsda beshta g‘alabaga erishdi, ikkita mag‘lubiyatga uchradi va 11 ta durang qayd etdi. Uning performansi 2749 ni tashkil etdi – bu Pragnanandhanikidan (2771) keyin turnirdagi eng yaxshi ikkinchi ko‘rsatkichdir. Musobaqa davomida Sindarovning blitsdagi reytingi to‘qqiz punktga o‘sdi.

Umumiy hisobda Pragnanandha 23,5 ochko jamg‘ardi: rapidda 12 va blitsda 11,5 ochko. Sindarov 22 ochko (11+11) bilan ikkinchi o‘rinni egalladi. Uchinchi o‘rinni 20,5 ochko bilan Uesli So, to‘rtinchi o‘rinni esa 19 ochko bilan Levon Aronyan band qildi.

Keyingi o‘rinlarda Lener Dominges, Fabiano Karuana va Yorden van Forest – har biri 17 ochkodan – bor. Anish Giri 15,5 ochko, Vinsent Kaymer 14,5 ochko, Evonder Lyan esa 14 ochko to‘pladi.

G‘olib 50 ming dollar, Sindarov 40 ming dollar, So 30 ming dollar, Aronyan esa 20 ming dollar mukofot oldi.

Pragnanandha uchun bu g‘alaba faoliyatidagi Grand Chess Tour seriyasining alohida bosqichidagi ikkinchi g‘oliblik bo‘ldi. U ilk bor 2025-yil may oyida Buxarestdagi bosqichda g‘olib chiqqan edi.

Turnirdan so‘ng Pragnanandha o‘zbekistonlik vakil bilan kechgan kurashni alohida ta’kidlab o‘tdi.

“Yakuniy hisobga qaralsa, hammasi silliq ko‘rinadi, ammo unday emasdi. Hammasi juda aql bovar qilmas tarzda kechdi. Javohirga hurmat ko‘rsatish kerak – u oxirigacha kurashdi”, – dedi hindistonlik grossmeyster.

Sindarovning o‘zi Karuanadan uchragan mag‘lubiyatdan tegishli xulosalar chiqarganini va umuman olganda o‘z o‘yinidan mamnun qolganini aytdi.

“Ba’zan yaxshi o‘ynashning o‘zi yetarli emas. Yana omad ham kerak”, – dedi u musobaqa yakunlari bo‘yicha.

Sent-Luisdagi natija Javohir Sindarovning Grand Chess Tour finaliga chiqish yo‘lidagi kurashi uchun alohida ahamiyatga ega.

Ikkinchi o‘rin uchun u seriyaning 10 ochkosini qo‘lga kiritdi va to‘rtta bosqichdan so‘ng 20,5 ochko bilan umumiy hisobning beshinchi qatoriga ko‘tarildi.

Fabiano Karuana 25 ochko bilan peshqadamlik qilmoqda. Undan keyingi o‘rinlarni Pragnanandha (24,5) va Uesli So (23,5) egallab turibdi. Finalga chiquvchi so‘nggi – to‘rtinchi o‘rinni esa 21 ochkoga ega Vinsent Kaymer band etgan.

Shu tariqa, Sindarovni finalga chiqish zonasidan atigi 0,5 ochko ajratib turibdi.

Grand Chess Tour bosqichidagi g‘alaba uchun 13 ochko, ikkinchi o‘rin uchun 10 ochko, uchinchi o‘rin uchun esa 8 ochko beriladi. Shundan so‘ng ishtirokchilar 7, 6, 5, 4, 3, 2 va 1 ochkodan oladi. O‘rinlar bo‘lishilganda, o‘sha pozitsiyalar uchun mo‘ljallangan ballar qo‘shiladi va shaxmatchilar o‘rtasida taqsimlanadi.

Grand Chess Tour finaliga umumiy hisobdagi eng yaxshi to‘rt nafar shaxmatchi chiqadi. Reytingning birinchi raqami to‘rtinchi, ikkinchisi esa uchinchi raqamli shaxmatchi bilan bahs olib boradi.

Sent-Luisda 10-20-avgust kunlari klassik shaxmat bo‘yicha o‘tkaziladigan va Grand Chess Tour muntazam qismining beshinchi, so‘nggi bosqichi hisoblanadigan Sinkfild kubogi hal qiluvchi ahamiyatga ega bo‘ladi.

Sindarov o‘z debyut GCT mavsumida seriya finaliga chiqishi uchun turnir yakunlariga ko‘ra umumiy hisobda Kaymerni ortda qoldirishi kerak.

Grand Chess Tour finalining o‘zi 22-27-avgust kunlari Sent-Luis shahrida o‘tishi rejalashtirilgan. Uning mukofot jamg‘armasi 450 ming dollarni tashkil etadi, shundan g‘olib 200 ming dollarni qo‘lga kiritadi.