Jahongir O‘rozov "Rubin" safida qancha maosh olishi ma’lum bo‘ldi

Jahongir O‘rozovning "Rubin"dagi maoshi oshkor bo‘ldi

Samarqandning "Dinamo" jamoasi a’zosi Jahongir O‘rozovning faoliyatini Rossiya Premyer Ligasida ishtirok etuvchi Qozonning "Rubin" klubida davom ettirishi avvalroq ma’lum qilingan edi. Sport24 nashrining xabar berishicha, O‘rozov "Rubin"ga o‘tishdan oldin tibbiy ko‘rikdan muvaffaqiyatli o‘tgan.

Qozon klubi Samarqandning "Dinamo"si bilan shartnomaning barcha shartlari bo‘yicha kelishuvga erishdi. 22 yoshli futbolchi hozirda yangi jamoasi bilan mashg‘ulotlarda qatnashmoqda va bo‘lajak o‘yinlarga tayyorgarlik ko‘rmoqda. Rasmiy transfer yaqin orada e’lon qilinishi kutilmoqda.

"Rubin" O‘rozovning ijarasi uchun 100 000 yevro to‘laydi. Shartnomada belgilanishicha, agar himoyachi joriy mavsumda jamoaning rasmiy o‘yinlarining kamida yarmida maydonga tushsa, "Rubin" O‘rozovni 700 000 yevroga sotib olish huquqiga ega bo‘ladi.

O‘rozovning Qozondagi yillik maoshi 450 000 yevroni tashkil etadi. "Dinamo"da esa u oyiga taxminan sakkiz ming dollar, yiliga esa taxminan 96 ming dollar ishlab topgan.

Ma’lumot uchun, Jahongir O‘rozov O‘zbekiston Superligasidagi o‘yinlari bilan terma jamoa bosh murabbiyi Fabio Kannavaroning e’tiborini tortgan. Futbolchi O‘zbekistonning Jahon chempionatidagi ilk o‘yinida zaxiradan maydonga tushgan bo‘lsa-da, keyingi o‘yinlarda asosiy tarkibda harakat qildi. Xususan, O‘rozov Kongo DR milliy jamoasiga qarshi uchrashuvda 7 marta xavfli vaziyatlarni bartaraf etgan.