FIFA “Andijon”ga yangi futbolchilarni ro‘yxatdan o‘tkazish bo‘yicha navbatdagi taqiqni qo‘ydi

FIFA "Andijon" klubiga yangi futbolchilarni ro‘yxatdan o‘tkazishni yana taqiqladi.

Joriy yilning 29-iyul kuni FIFA Intizom qo‘mitasi "Andijon" futbol klubiga sobiq murabbiy Mikola Tishenkoga bo‘lgan qarzini to‘lamagani sababli yangi o‘yinchilarni ro‘yxatdan o‘tkazishga cheklov qo‘ydi.

Agar klub sobiq murabbiyga bo‘lgan qarzini uzmasa, ketma-ket uchta transfer oynasi davomida yangi futbolchilarni ro‘yxatdan o‘tkaza olmaydi.

PFL saytida e'lon qilingan xabarda shunday deyiladi: "Bu boradagi FIFA xabarnomasi kecha, Toshkent vaqti bilan soat 18:54 da O‘zbekiston futbol assotsiatsiyasiga yetib kelgan. "Andijon" klubining bir qator yangi futbolchilar bilan tuzgan shartnomalari esa Ligada bu vaqtdan biroz keyinroq ro‘yxatga olingan. FIFA Intizom kodeksining 50-moddasi 1-bandiga muvofiq, qarorlar ular e'lon qilingan vaqtdan boshlab kuchga kiradi. Shundan kelib chiqib, Liga "Andijon" shartnomasini ro‘yxatdan o‘tkazgan futbolchilarni klub FIFA taqiqi masalasini hal qilmaguncha Superliga musobaqasi uchun ro‘yxatga kiritmaydi".