FIFA avgustda JCH ishtirokchilari sonini 64 taga yetkazish masalasini ko‘rib chiqadi — manba

FIFA avgust oyida Jahon chempionati ishtirokchilari sonini 64 taga oshirish masalasini ko‘rib chiqadi — manba

Jahon chempionatini nazorat qiluvchi yangi tijorat kompaniyasini tashkil etish rejalari atrofidagi xalqaro kelishmovchiliklar davom etayotgan bir paytda, Xalqaro futbol federatsiyasi (FIFA) turnir ishtirokchilari sonini 64 ta jamoaga yetkazish masalasini tezlashtirish niyatida. Sky News telekanalining xabar berishicha, musobaqani kengaytirish imkoniyatlarini o‘rganish uchun maxsus mustaqil komissiya tuziladi.

Joriy yilning 7-avgust kuni yig‘iladigan ushbu komissiya bozor talabi va mundial qamrovini kengaytirishning ehtimoliy oqibatlarini baholash bilan shug‘ullanadi. Komissiya 14-avgustdayoq mazkur masala yuzasidan o‘z xulosasini chiqarishi kutilmoqda, yakuniy qaror natijalari esa 11-sentyabr kuni ommaga e’lon qilinadi.

Turnir qamrovini yanada kengaytirishga qaratilgan bu qadamlar FIFA rahbariyati va qit’a konfederatsiyalari o‘rtasidagi keskin ziddiyatlar fonida yuz bermoqda. Avvalroq The Times nashri FIFA rahbari Janni Infantinoning barcha tijorat va turnirlarni tashkil etish huquqlarini o‘zida birlashtiruvchi “FIFA Forward Enterprise” (FFE) nomli yangi kompaniya tuzib, uning ma’lum ulushini xususiy sarmoyadorlarga sotish niyatida ekanini xabar qilgandi. Tashkilot o‘z rasmiy saytida bu loyihani tasdiqlagach, vaziyat butunlay izdan chiqdi: UEFA a’zolari bir ovozdan FIFA turnirlarini boykot qilishga kelishib oldi. Shuningdek, mazkur tijoriy islohot Shimoliy va Markaziy Amerika (KONKAKAF) hamda Osiyo (OFK) futbol konfederatsiyalari tomonidan ham qat’iy qoralanmoqda.

Eslatib o‘tamiz, AQSH, Kanada va Meksika maydonlarida bo‘lib o‘tgan JCH-2026 turnirida tarixda ilk bor 48 ta terma jamoa ishtirok etdi.