Diomandening taqdiri 24 soat ichida hal bo‘ladi

Diomandening kelajagi keyingi 24 soat ichida aniqlanadi

Madridning "Real" klubi "Leypsig" vingeri Yan Diomandening transferini tez fursatda yakunlashga intilmoqda. Hozirda tomonlar o‘rtasida muzokaralar davom etmoqda.

3-avgust kuni "Leypsig" sport direktori Diomandening transferi hali yakunlanmaganini va klublar o‘rtasida yakuniy kelishuvga erishilmaganini ma’lum qilgan edi.

Jurnalist Florian Plettenbergning xabariga ko‘ra, yaqin kunlarda klublar o‘rtasida muzokaralarning navbatdagi bosqichi bo‘lib o‘tadi. "Real Madrid" transferni imkon qadar tezroq yakunlashni maqsad qilgan. Klub Diomandeni tez orada tibbiy ko‘rikdan o‘tkazib, uning "Leypsig"ning Avstriyadagi mavsumoldi yig‘iniga qo‘shilmasligini istamoqda.

Manbaga ko‘ra, muzokaralarda ijobiy siljish kuzatilmoqda. Kelasi 24 soat transfer taqdiri uchun hal qiluvchi ahamiyat kasb etishi mumkin.

Ma’lumot uchun, Yan Diomande 2025-yildan buyon "Leypsig" safida to‘p surib kelmoqda. U 2025/26-yilgi mavsumda barcha musobaqalarda 36 ta uchrashuvda maydonga tushib, 13 ta gol urdi va 10 ta golli uzatmani amalga oshirdi. Shuningdek, Kot-d’Ivuar terma jamoasi safida Jahon chempionatida 4 ta o‘yinda ishtirok etib, bitta golli uzatma muallifi bo‘ldi.

Transfermarkt portaliga ko‘ra, 20 yoshli futbolchining ayni paytdagi taxminiy transfer qiymati 90 million yevroga baholanmoqda.