AQSH Eronga quruqlikdan bostirib kirmoqchi — Pokiston razvedkasi
AQSH Eron hududiga quruqlikdan bostirib kirishni rejalashtirmoqda, deya xabar berdi Pokiston razvedkasi.
Pokiston maxsus xizmatlarining ma’lumotlariga ko‘ra, AQSH prezidenti Donald Tramp o‘z harbiylarining ogohlantirishlariga qaramay, Eronga qarshi cheklangan quruqlik hujumini boshlashga buyruq berishi mumkin. Islomoboddagi xavfsizlik manbalari bu xulosani hozirgi harbiy kuzatuvlarga asoslangan holda taqdim etgan.
Ekspertlar amerikalik harbiylarning Eronga bostirib kirishini juda xavfli deb hisoblamoqda, chunki desant kuchlari raketa va dron hujumlariga duch kelishi muqarrar. Mutaxassislar Eronni "tabiiy qal’a" deb atashadi, chunki tog‘lar va issiq cho‘llar qo‘shinlarning oldinga siljishini juda qiyinlashtiradi.
AQSH Harbiy-dengiz instituti tahlilida shunday deyiladi: "Noqulay hudud harbiylarni bostirib kirish haqida ikki marta o‘ylab ko‘rishga majbur qilishi kerak". Institut bunday sharoitda quruqlikdagi qo‘shinlarning imkoniyatlarini "imkonsiz" deb baholamoqda. Texnikalar, jumladan, tanklarning tez ishdan chiqishi ham qo‘yilgan maqsadlarga erishishni qiyinlashtiradi.
**Kuchlar nisbati**
Raqamlar ham Eron rejimining ustunligini ko‘rsatmoqda. Tehron ixtiyorida 610 ming nafar amaldagi harbiy va harbiylashtirilgan birikmalar hamda 350 ming nafar zaxiradagi askar bor. Quruqlikdagi operatsiya AQSH uchun oqibati noma’lum bo‘lgan og‘ir sinovga aylanishi mumkin.
Buning ustiga, Tramp o‘z xalqiga ushbu operatsiyani tushuntirib berishi kerak bo‘ladi. Reuters o‘tkazgan Ipsos so‘rovnomasiga ko‘ra, AQSH fuqarolarining bor-yo‘g‘i uchdan bir qismi harbiy operatsiyani qo‘llab-quvvatlamoqda. Respondentlarning 69 foizi Tramp harbiy aralashuvdan ko‘zlangan maqsadlarni yetarlicha aniq tushuntirib bermagan deb hisoblaydi.
**Muzokaralar va Eron pozitsiyasi**
Manbalarning bildirishicha, Pokiston va Qatar Vashington hamda Tehron o‘rtasida takliflarni yetkazishda yana vositachilik qilmoqda. Biroq Eron vaqtincha emas, doimiy otashkesim tuzilishini talab qilmoqda.
Shuningdek, Eron harbiylari AQSHni quruqlikdagi hujumdan ogohlantirdi. Tehron bunday operatsiyaga to‘liq tayyor ekanini bildirdi. Ayni paytda, Tramp 29-iyul kuni Iordaniyadagi Amerika harbiy bazasiga berilgan hujumiga javoban AQSH Eronga zarbalar berishni boshlashini aytdi.