Японияда ишлаш учун номзодлар Ангрендаги марказда сараланиши кутилмоқда
Октабр ойида Япониянинг йирик транспорт-логистика компаниялари вакилларининг Ўзбекистонга ташрифини ташкил этиш масаласи ишлаб чиқилмоқда. Ташриф доирасида Ангрендаги Узбекистан Проуд Асадемй марказида Японияда ишлаш учун номзодлар билан саралаш суҳбатлари ўтказилиши кўзда тутилган.
Японияда ишлаш учун номзодлар Ангрендаги марказда сараланиши кутилмоқда
«Дунё» ахборот агентлиги хабарига кўра, бу масалалар Ўзбекистоннинг Япониядаги элчихонасида Проуд Партнерс компанияси раҳбарияти билан ўтказилган учрашувда муҳокама қилинган.
Музокараларда Ангрен шаҳрида фаолият юритаётган Узбекистан Проуд Асадемй - УПА маркази доирасидаги ҳамкорликни янада кенгайтиришга алоҳида эътибор қаратилган. Хусусан, ўзбекистонлик ёшларга япон тили ҳамда зарур касбий кўникмаларни ўргатиш, сўнг уларни Японияда ишга жойлаштириш масалалари кўриб чиқилган.
Режалаштирилаётган ташриф чоғида япон иш берувчилари марказ фаолияти ва ўқув инфратузилмаси билан танишиши, шунингдек, келгусида Японияда ишлаш учун номзодларни танлаш юзасидан суҳбатлар ўтказиши кутилмоқда.
Ҳамкорлик ўзбекистонликларнинг Японияда ишга жойлашиш имкониятларини кенгайтириш, иш берувчилар билан бевосита алоқаларни мустаҳкамлаш ҳамда транспорт-логистика соҳаси учун малакали кадрлар тайёрлашга йўналтирилган.
Хабарда саралаш суҳбатларининг аниқ санаси, номзодларга қўйиладиган талаблар ва ариза топшириш тартиби келтирилмаган.