Япония компаниялари учун Ўзбекистонда саноат парки очилиши мумкин
Ўзбекистонда Япония бизнеси иштирокида қўшма саноат парки ташкил этиш масаласи муҳокама қилинди. Ўзбекистон дипломатлари бу борада Япониянинг Сумитомо Сорпоратион савдо-инвестиция компанияси раҳбарияти билан музокара ўтказди.
Япония компаниялари учун Ўзбекистонда саноат парки ташкил этилиши мумкин.
«Дунё» ахборот агентлиги маълумотига кўра, учрашувда Япония томонига компания департаменти директори Ёшиказу Нишикава раҳбарлик қилган.
Музокараларда етакчи ишлаб чиқарувчилар учун қўшма саноат паркини яратиш имкониятлари муҳокама қилинган. Сумитомо Сорпоратионнинг тажрибаси ва салоҳияти орқали Япониядан қўшимча инвестициялар жалб этиш ҳамда саноат соҳасидаги ҳамкорликни кенгайтириш режалаштирилмоқда.
Ўзбекистон дипломатлари мамлакатда энергия самарадорлигини ошириш ва қайта тикланувчи энергия манбаларидан фойдаланишни кенгайтириш борасида амалга оширилаётган ислоҳотлар ҳақида ҳам маълумот берган.
Томонлар стратегик шерикликни ривожлантириш ҳамда Япония бизнеси иштирокидаги лойиҳаларни амалга ошириш муҳимлигини қайд этган.
Учрашув якунида амалдаги лойиҳалар бўйича ишлар жадвали мувофиқлаштирилган. Шунингдек, ҳамкорликнинг янги йўналишларини ишлаб чиқишга келишиб олинган.
Саноат паркини ташкил этиш масаласи ҳозирча муҳокама босқичида қолмоқда. Хабарда унинг жойлашуви, инвестиция ҳажми ёки ишга тушириш муддати келтирилмаган.
Сумитомо Сорпоратион 1919-йилда Японияда ташкил этилган. Компания саноат, инфратузилма, энергетика, транспорт ва шаҳарсозлик йўналишларида фаолият юритади.