Янги Тошкентга инвесторлар учун дастлабки 50 та ер участкаси тайёрланди

Янги Тошкент лойиҳаларига қизиқиш билдирган хорижий инвесторлар учун дастлабки 50 та ер участкаси аниқлаб олинди. Уларга участкаларнинг жойлашуви, лойиҳаларни амалга ошириш имкониятлари, иқтисодий ҳисоб-китоблар ва янги имтиёзлар кўрсатилган таклифлар тақдим этилади.

Бу ҳақда президент Шавкат Мирзиёев маълум қилди.

Қайд этилишича, Ўзбекистоннинг хориждаги дипломатик ваколатхоналарига хорижий инвесторларни Янги Тошкент имкониятлари билан янада батафсил таништириш топширилди.

Вазирлар ҳам хорижий ҳамкорлар ва йирик компаниялар билан ҳар бир учрашувда ушбу лойиҳаларни тақдимот қилишлари ва уларни ҳамкорликка таклиф этишлари керак.

Президент инвестиция таклифлари қоғозда қолиб кетмаслиги кераклигини таъкидлади. Унинг сўзларига кўра, инвесторларга аниқ ер участкалари, иқтисодий ҳисоб-китоблар ва амалга ошириш муддатлари кўрсатилган тайёр лойиҳаларни топшириш зарур.

Олдинроқ Шавкат Мирзиёев шаҳар қурилишини жадаллаштириш ва хусусий инвестицияларни янада фаолроқ жалб қилиш зарурлигини маълум қилган эди. Унинг сўзларига кўра, бизнеснинг лойиҳадаги иштироки суръатлари ҳозирча мавжуд имкониятларга мос келмаяпти.