Хотинини ўз жонига қасд қилиш даражасига етказганликда айбланаётган собиқ пробация инспекторининг иши судда кўриб чиқилади
Самарқанд вилоятида пробация собиқ инспектори хотинини ўз жонига қасд қилиш даражасига етказишда ва ўлдириш билан қўрқитишда айбланмоқда. Nemolchi.uz маълумотларига кўра, аёл бир неча бор ички ишлар органларига мурожаат қилган, бироқ эрига фақат ҳайфсан берилган, туман ИИБ раҳбарияти эса эр-хотинни яраштиришга ундаган.
Аёлини ўз жонига қасд қилиш даражасига етказганликда айбланаётган пробация собиқ инспекторининг иши судга оширилади
Самарқанд вилояти Оқдарё тумани ИИБ собиқ пробация инспектори Беҳзод Олимовга нисбатан қўзғатилган жиноят иши судга келиб тушди. Бу ҳақда Ўзбекистондаги зўравонликка қарши Nemolchi.uz лойиҳаси айблов хулосасига таяниб хабар берди.
Беҳзод Олимовга Ўзбекистон Жиноят кодексининг 103-моддаси 2-қисми «а» банди (Айбдорга моддий томондан ёки бошқа жиҳатдан қарам бўлган шахсни ўз жонига қасд қилиш ёки ўз жонига қасд қилишига уриниш даражасига етказиш), шунингдек, 112-моддаси 1-қисми (Ўлдириш ёки зўрлик ишлатиш билан қўрқитиш) бўйича айб қўйилмоқда.
Ушбу моддаларнинг биринчиси бўйича 7 йилдан 10 йилгача озодликдан маҳрум қилиш жазоси назарда тутилган.
Тергов талқинига кўра, Олимов турмуш ўртоғини мунтазам равишда калтаклаб, устидан масхара қилган ва бир неча бор ўлдириш билан таҳдид қилган. Тергов аёлнинг 2026 йил 6 майдан 7 майга ўтар кечаси ўз жонига қасд қилишга уринишини айнан эрининг шафқатсиз муомаласи билан боғлайди. Суд-тиббий экспертизаси у олган жароҳатларни ҳаёт учун хавфли бўлган оғир тан жароҳатлари тоифасига киритди.
Nemolchi.uz муаллифлари Олимов айбини тан олмагани ва хизмат қуроли билан таҳдид қилганини рад этаётганини қайд этди.
Nemolchi.uz хабарига кўра, айблов хулосасида ички ишлар органларига маълум бўлган зўравонлик ва таҳдидларнинг олдинги эпизодлари ҳам тавсифланган.
Хусусан, жабрланувчининг кўргазмаларига кўра, 2026 йил 15 февралда эри унга хизмат тўпончаси билан таҳдид қилиб: «Ҳозир пешонангга отаман», деган. Қурол билан таҳдид қилингани ҳақида 102 рақамига мурожаат қилган унинг отаси ҳам терговга айтиб берган.
Аёлнинг сўзларига кўра, шундан сўнг туман ИИБ бошлиғи Алишер Ибодов уни ва отасини оилани сақлаб қолиш учун Олимовни кечиришга кўндирган ва вазиятни назоратга олишга ваъда берган. Жабрланувчининг отаси ҳам терговга ИИБ бошлиғи ва унинг ўринбосарлари профилактик суҳбатлар ўтказиш ва янги жанжалларнинг олдини олишга ваъда берганини маълум қилган.
Ибодовнинг кўргазмаларига кўра, у эр-хотинни яраштирган ва оилага ёрдам беришга ваъда берган.
«Ва буларнинг барчаси — аёлга нисбатан зўравонлик ва таҳдидларнинг кўплаб фактларига қарамай. Аслида, оилани унинг соғлиғи ва ҳаёти эвазига сақлаб қолишга ҳаракат қилишган», — деб таъкидлади Nemolchi.uz.
Аёлнинг 2025—2026 йиллардаги кўплаб мурожаатлари ҳақида терговга туман ИИБ бошлиғининг жамоат хавфсизлиги хизмати бўйича ўринбосари Санжар Ибоев ҳам айтиб берган. Унинг сўзларига кўра, мурожаатлар бўйича хизмат текширувлари ўтказилган, Олимовга эса интизомий жазо чоралари қўлланилган.
2025 йил январь ойидаги калтаклашдан сўнг, жабрланувчининг таъкидлашича, тахминан ўша йилнинг февраль ойида эри ҳайфсан олган. Яна бир ҳайфсан унга 2026 йил 6 мартда — аёлнинг кўргазмаларига кўра, у тўпонча билан таҳдид қилган февраль эпизодидан сўнг эълон қилинган.
Nemolchi.uz маълумотларига кўра, Олимов аёлининг ўз жонига қасд қилишга уринишидан деярли икки ой ўтиб — 4 июль куни қамоққа олинган. Лойиҳа содир бўлган воқеа ҳақида май ойида ҳикоя қилган эди.
Nemolchi.uz Олимовни қамоққа олиш муддатлари ва нега аёлнинг олдинги мурожаатлари, жумладан хизмат қуроли билан таҳдид қилингани ҳақидаги хабар унга ҳимояни таъминламагани юзасидан саволларни ўртага ташлади. Лойиҳа, шунингдек, зўравонлик ва таҳдидлар ҳақида билган ИИБ раҳбарларининг ҳаракатларига баҳо беришга чақирди.
«Мамлакатда зўравонликка тоқатсизлик ва аёлларни ҳимоя қилиш ҳақида кўп гапирилмоқда. Бироқ сўзлар ИИБ аризадан сўнг кўрадиган ҳаракатлар билан тасдиқланиши керак. Хизматчиси томонидан зўравонлик ҳақидаги хабарларга жавобан аёлни ярашишга кўндиришса, у эса хизматни давом эттираверса, ҳуқуқни муҳофаза қилиш органларига қандай ишониш мумкин? Тизим жабрланганларни ҳимоя қилиши ва айбдорларнинг — жумладан погон таққанларнинг жавобгарлигига эришиши керак. ИИБ раҳбарияти учун қайси бири муҳимроқ: аёлни ҳимоя қилишми ёки тизимда агрессив ходимни сақлаб қолишми?» — дея савол берди лойиҳа муаллифлари.