Гулистонда маҳкумдан ҳар ой 1 млн сўм талаб қилган собиқ пробация инспектори жазоланди
Гулистонда маҳкумдан ҳар ой 1 млн сўм сўраган собиқ пробация инспектори жазога тортилди
Сирдарё вилоятининг Гулистон шаҳрида ўз назоратидаги маҳкумдан ҳар ой 1 млн сўмдан пул талаб қилган собиқ пробация инспекторига 5 йил муддатга озодликни чеклаш жазоси белгиланди.
Маълум бўлишича, О.П. 2024-йил августидан 2025-йил майигача Гулистон шаҳар ИИБда тезкор вакил сифатида ишлаган. 2025-йил ноябрида эса пробация инспектори лавозимига ўтган.
2025-йил декабр бошида унга озодликни чеклаш жазосини ўтаётган маҳкумни назорат қилиш вазифаси юклатилган.
Инспектор 5-декабр куни маҳкумни хизмат хонасига чақириб, унинг ҳужжатлари ва жазони ўташ тартиби билан танишган. Маҳкумнинг суддаги кўрсатмасига кўра, учрашувдан кейин инспектор ундан “тушликка бирор нима ташлаб кетиш”ни сўраган.
“Шунда чўнтагимдаги 200 минг сўмни ташлаб кетишга мажбур бўлдим. Кейинчалик уйимга текширув учун келганида ҳам 200 минг ва 150 минг сўмдан пул бердим”, дейди маҳкум ўз кўрсатувида.
О.П. эркакнинг сантехник бўлиб ишлашини билиб, уни ўз уйига чақирган. Маҳкум у ерда иситиш тизими ва бошқа сантехника ишларини бажарган, бироқ бунинг учун ҳақ олмаган.
“Ҳар ой 1 млн сўм берасан”
Жабрланувчининг айтишича, инспектор ундан мунтазам равишда ҳар ой 1 миллион сўмдан пул бериб туришни талаб қилган ва бунинг эвазига назорат тартибини юмшатишга ваъда берган.
Хусусан, ИИБ ходимлари текширувга келишидан олдин хабар бериш, белгиланган вақтда уйда бўлиши кераклигига қарамай, кечаси бир-икки соат кўчага чиқишига кўз юмиш ҳамда қоидабузарлик аниқланса, бошқа ходимлар олдида уни ҳимоя қилишини айтган.
Бундан ташқари, маҳкумга аввал берилган “огоҳлантириш” интизомий жазосини бекор қилдиришга ёрдам беришини билдирган.
2026-йил январ бошида О.П. пул масаласини яна кўтарган. Маҳкум 7-январ куни унга пул бериши керак бўлган, бироқ маблағ топа олмаган.
Эртаси куни улар учрашган. Маҳкум ёнидаги пулнинг бир қисмига инспекторга сигарета олиб берган, қолган пулини ҳамда автомобилидаги 60 дона тухумни унга қолдирган.
9-январ куни инспектор маҳкумни Гулистондаги банклардан бири олдига чақирган. Суҳбат чоғида О.П. 6—7 млн сўм пул кераклигини айтган. Маҳкум бунча маблағни бирдан топа олмаслигини билдириб, ёнидаги 997 минг сўмни берган ва қолганини кейин топиб беришини айтган.
Шундан сўнг маҳкум талаб қилинган пулни топа олмагани сабаб ДХХнинг Сирдарё вилояти бошқармасига мурожаат қилган.
О.П. судда айбнинг бир қисмига иқрор бўлган. У маҳкумдан айрим пулларни олганини инкор этмаган, бироқ уларни пора сифатида эмас, қарзга олганини билдирган.
Хизмат текшируви давомида О.П. аввал тезкор вакил бўлиб ишлаган даврида бир нечта қонунбузарлик ҳолатларига йўл қўйгани ҳам аниқланган. Жумладан, 2025-йил май ойида бир аёл банк картасидан номаълум шахслар 10 млн сўм ечиб олгани юзасидан ИИБга мурожаат қилган. Ҳолатни текшириш О.P.ga топширилган. Бироқ у пул қаерга ўтказилганини аниқлаш ва зарур текширувларни ўтказиш ўрнига, аёл номидан бошқа мазмундаги тушунтириш хатини расмийлаштирган.
Унда гўёки пул аёлнинг ўз эҳтиёцизлиги сабаб картадан ечилгани, унинг ҳеч кимга даъвоси йўқлиги ва зарар кўрмагани ёзилган. Ҳужжатдаги аёлнинг имзоси ҳам қалбакилаштирилган. Шу ҳужжатлар асосида ҳолат юзасидан жиноят иши қўзғатиш рад этилган.
Шунингдек, О.П. автомобилдан 4 млн сўм, хонадондан велосипед ҳамда курка ва хўроз ўғирлангани ҳақидаги айрим мурожаатларни тегишли тартибда текширмагани ҳам аниқланган.
Жиноят ишлари бўйича Оқолтин туман суди О.P.ni Жиноят кодексининг 210-моддаси 1-қисми (пора олиш) ҳамда 230-1-моддаси 3-қисми (далилларни сохталаштириш) билан айбдор деб топган. Унга 2 йил муддатга ички ишлар органларида ишлаш ҳуқуқидан маҳрум қилган ҳолда, 5 йил озодликни чеклаш жазоси тайинланган.