Хитой сувости дронлари учун иккита «сузувчи база» қуряптими?
Хитойнинг Гуанчжоу шаҳрида йирик сувости дронларини ташиш ва уларга хизмат кўрсатишга мўлжаллангани тахмин қилинаётган янги кема тасвирга олинди. У аввал Шанҳайда кузатилган кемага ўхшайди. Янги суратлар мамлакатда шундай вазифадаги камида иккита кема қурилаётган бўлиши мумкинлигини кўрсатмоқда.
Хитой сувости дронлари учун иккита «сузувчи база» қураяптими?
Тҳе Вар Зоне нашрининг ёзишича, тахминан бир ой аввал Шанхайдаги Чансиндао ороли верфига оид ғайриоддий кема қурилиши якунланишга яқинлашгани ҳақида хабарлар тарқалган. Унинг тузилиши сувости учувчисиз аппаратларини жойлаштириш, сувга тушириш ва уларга хизмат кўрсатиш учун мослаштирилган бўлиши мумкин.
Гуанчжоуда олинган янги суратда ташқи кўриниши жиҳатидан Шанхайдаги кемага жуда ўхшаш, бироқ ундан кичикроқ кема тасвирланган. Дастлабки ҳисоб-китобларга кўра, у аввалгисидан тахминан учдан бирга кичик. Корпус шаклида ҳам айрим фарқлар бор.
Янги кемада олтита кўтариш минораси кўринади. Шанхайдаги каттароқ кемада эса олтита катта ва олтита кичик конструксия мавжуд. Иккала лойиҳада ҳам олдинги устқурма ортида парвоз палубаси ва ангар жойлашган, тутун қувурларининг жойлашуви ҳам ўхшаш.
Ҳозирча бу кемалар, аввало, тажриба платформалари сифатида баҳоланмоқда. Уларнинг аниқ вазифалари ва имкониятлари ҳақида очиқ маълумотлар чекланган.
Бундай кемалар йирик сувости дронларини Хитой соҳилларидан узоқ ҳудудларга олиб бориш, сувга тушириш, қайтариб олиш ва техник хизмат кўрсатиш имконини бериши мумкин. Бу узоқ вақт мустақил патруллик қила оладиган аппаратлардан фойдаланишни енгиллаштиради.
Катта масофага ҳаракатлана оладиган сувости дронлари денгиз тубини хариталаш, миналарни қидириш, сувости кемалари ва сув устидаги нишонларни аниқлаш каби вазифаларни бажариши мумкин. Келажакда бундай аппаратлардан қанотли ракеталар ёки бошқа дронларни учириш учун фойдаланиш эҳтимоли ҳам муҳокама қилинмоқда. Бироқ бу имкониятлар айнан суратдаги кемалар ёки улар ташийдиган аппаратларда мавжудлиги тасдиқланган эмас.
Материалда бундай флотнинг кенгайиши Хитойнинг Тинч океанидаги узоқ ҳудудларда операциялар ўтказиш имкониятларини ошириши мумкинлиги таъкидланган. АҚШ обьектларига эҳтимолий таҳдид ҳақидаги мулоҳазалар эса ҳозирча ушбу технологияларнинг келажакдаги қўлланишига оид баҳолардир.