Хитой сувости дронларини олиб юришга қодир “она кема” қурмоқда (фото)
Хитой сувости дронларини ташишга қодир “она кема” барпо этмоқда (фото)
Хитой сувости дронларини жойлаштириш учун “она кема” қурмоқда. Бу ҳақда сунъий йўлдош тасвирларига таянган ҳолда Тҳе Индепендент хабар берди.
Сунъий йўлдош тасвирлари Вантор томонидан тақдим этилган бўлиб, уларда кеманинг Шанхайдаги Ҳудонг-Зҳонгҳуа кемасозлик заводида қурилаётгани кўрсатилган. Хитой аввал ҳам шу заводда йирик амфибия ҳарбий кемаларини қурган.
Улардан бирининг узунлиги 35 метр бўлиб, АҚШ ҳарбий-денгиз кучларининг Орса сувости аппаратидан икки баравар катта, иккинчисининг узунлиги эса 45 метрни ташкил этади.
“Энг ишончли изоҳ шуки, бу дронларга мўлжалланган сувости она кемаси”, деди денгиз флоти тарихчиси ва таҳлилчи Ҳ. И. Суттон Навал Невс нашрида.
У кеманинг эҳтимолий вазифасини аниқлаш учун бир нечта сунъий йўлдош тасвирлари ўрганилганини айтди. Оммавий ахборот воситаларига кўра, амфибия кемасининг корпуси тахминан 204 метр узунликда ва 27 метр кенгликда. У 12 та вертикал кўтариш мосламаси ёрдамида сувга туширилиши мумкин бўлган махсус платформага эга.
Бу эса кеманинг “фуқаролик ёки тадқиқот мақсадларида фойдаланилиши” ҳақидаги тахминни ишончсиз қилади. Мудофаа мутахассислари сунъий йўлдош тасвирларидан олинган далиллар ишончли, аммо якуний хулоса чиқариш учун етарли эмаслигини айтмоқда.
“Сунъий йўлдош тасвирлари Хитой йирик сувости дронлар учун махсус она кема қураётганини исботламайди. Аммо бу имкониятни рад этишни тобора қийинлаштиради”, деди Бирлашган Қироллик хизматлар институти доценти Алессандро Ардуино.
У Хитой кўпроқ сенсорлар, юк ва энергияни олиб юришга қодир бўлган, шу орқали денгизда узоқроқ қолиши ва топшириқларни камроқ харажат эвазига бажариши мумкин бўлган йирикроқ автоном сувости платформасини ишлаб чиқаётганини айтди. Хитой ҳарбийлари бундай кема қурилаётганини на тасдиқлади, на инкор этди.
“Бу янги турдаги платформа. Мен махсус қурилган сувости кемасига эга бўлган бошқа ҳеч қандай давлатни билмайман”, деди Ҳиндистоннинг Такшашила институти тадқиқотчиси Адитя Раманатан.
Сувости дронлари кичик ўлчамлари сабаб кўплаб жиҳатларда чекланган бўлса-да, йирик кемалар бажара олмайдиган вазифаларни, масалан, саёзроқ ҳудудларга киришни амалга ошириши мумкин.
“Улар товушларни, бошқа кемаларнинг акустик белгилари ҳақида маълумотларни тўплаши ва катта маълумотлар базасини яратиши мумкин, шундай қилиб, келажакда улар бу акустик белгиларни аниқлаганда, нимага дуч келганликларини дарҳол айта олади”, деди Раманатан.
Таъкидланишича, “она кема” ушбу сувости дронларининг қамровини кенгайтириши ва рақибларининг навигация эркинлигини чеклашга хизмат қилиши мумкин.