Хитойда 116 дрон сув остида рекорд ўрнатди

Хитойда 116 та дрон сув остида рекорд натижа қайд этди

Синовда Хитойнинг Шимоли-ғарбий политехника университети ҳамда Хиъан Тианҳе Маритиме Течнологиес компанияси яратган автоном сув ости аппаратлари қатнашди. Намойиш 29-август куни Гиннесс рекордлар китоби вакиллари иштирокида ўтказилди.

ТҲ-618 номли дронлар синов пайтида ягона автоном гуруҳ сифатида ҳаракат қилди. Аввал операторлар аппаратларни биттадан ишга туширди, сўнг бошқарув уларнинг бортдаги автоном навигация тизимларига топширилди.

Дронлар узунлиги қарийб 500 метр бўлган бассейнда олдиндан белгиланган йўналиш бўйлаб сузди. Улар 34 дақиқа давомида ҳаракатини ўзаро мувофиқлаштирган ҳолда тахминан 500 метр масофани босиб ўтди.

Ҳар бир аппарат белгиланган йўналишдан чиқмаслик учун реал вақт режимидаги маълумотлардан фойдаланди. Ташқи таъсирлар дронни йўналишидан оғдирган ҳолатларда тизим унга ҳаракат йўналишини мустақил равишда тузатиш имконини берди.

Ўнлаб сув ости аппаратларининг бир вақтда мувофиқлашган ҳолда ҳаракатланишини таъминлаш ҳар бир дронга алоҳида йўналиш белгилашдан ҳам мураккаброқ вазифа саналади. Сув остида радиосигналлар ҳаводагидан бошқача тарқалади. Шу боис аппаратлар ўртасида ишончли алоқани таъминлаш жиддий муҳандислик муаммоси бўлиб қолмоқда.

Шимоли-ғарбий политехника университети синов натижасини янада йирик автоном сув ости тизимларини яратиш йўлидаги олдинга силжиш деб баҳолади. Университет йигирма йилдан ортиқ вақтдан бери сув остида зондлаш, акустик алоқа ва камералар орқали атрофни англаш технологиялари устида ишламоқда.

Тизимдаги дронлар сонини янада ошириш учун ҳар бир аппарат алоқа имкониятлари чекланган ва кўриниш ёмон бўлган шароитда ҳам қўшни дронларнинг жойлашувини ҳисобга ола билиши керак.

ТҲ-618 аппаратининг узунлиги тахминан 61 сантиметр, эни 20 сантиметр, оғирлиги эса 5,1 килограммни ташкил этади. Ихчам ўлчамлар улардан катта гуруҳ таркибида фойдаланишни қулайлаштиради.

Маълумотларга кўра, дронлар 30 километргача масофани босиб ўтиши ва саккиз соатдан ортиқ ишлаши мумкин. Навигация учун камерага асосланган тизим қўлланади: у аппаратга атрофни таҳлил қилиш ва ҳаракат йўналишини тўғрилашда ёрдам беради.

Аппаратлар йўналишдан оғишга сабаб бўладиган шароит ўзгаришларига ҳам жавоб қайтара олади. Бу сув остида айниқса муҳим: оқимлар ва бошқа ташқи таъсирлар дронни аста-секин белгиланган йўлдан четга суриши мумкин.