Хитой Nvidia бош директорини нишонга олган айғоқчилик операцияси ҳақидаги айбловларни рад этди
АҚШ разведкасининг мансабдор шахслари хитойлик тадбиркор аёл Пекин учун АҚШнинг чиплар ишлаб чиқарувчи йирик компанияси ҳақида маълумот йиғаётган эди, деб ҳисобламоқда, хабар беради The New York Times.
Хитой Nvidia бош ижроия директори Жансен Хуангга қарши айғоқчилик операциясини амалга оширгани ҳақидаги даъволарни рад этиб, бу айбловларни «асоссиз тахминлар» деб атади.
The New York Times хабарига кўра, АҚШ разведка хизмати мулозимлари Сингапурда жойлашган Megaspeed маълумотларни қайта ишлаш маркази компанияси билан боғлиқ хитойлик тадбиркор аёл Элис Хуанг Пекин учун АҚШнинг чип ишлаб чиқарувчи гиганти ҳақида маълумот йиғаётган бўлган деб ҳисоблайди. Хабарда айтилишича, Жансен Хуангга қариндошлик алоқаси бўлмаган Элис Хуанг Nvidia’нинг замонавий сунъий интеллект чипларини Хитойга ноқонуний равишда юбориш мумкинлиги бўйича тергов қилинган ва Жансен билан яқин муносабат ўрнатган.
Nvidia нашрга уларнинг алоқалари одатий бизнес муносабатлари бўлганини маълум қилди, Пекин эса Вашингтонни Хитойга туҳмат қилишга уринишда айблади. Элис Хуанг газетанинг изоҳ бериш сўровига жавоб бермади.
The New York Times томонидан келтирилган исми ошкор этилмаган манбаларнинг айтишича, АҚШ разведка агентликлари Элис Хуангнинг ҳаракатларини кузатиб борган ва у Хитой ҳукумати номидан ҳаракат қилган деган хулосага келган.
Хабар қилинишича, кузатув давомида Элис Хуанг ва кейинчалик «ошкор қилиш» жараёни орқали Жансен Хуанг экани аниқланган АҚШ фуқароси ўртасидаги мулоқотлар аниқланган.
Хуанг Ле номи билан ҳам танилган Элис Хуангнинг Пекинга айнан қандай маълумотларни узатгани, бу маълумотлар қанчалик муҳим бўлгани ёки у қачондан бери разведка маълумотларини йиға бошлагани ҳозирча номаълумлигича қолмоқда.
Жума куни бўлиб ўтган одатий брифингда Хитой Ташқи ишлар вазирлиги нотиғи Го Цзякун шундай деди: «Тилга олинган хабар асоссиз тахминларга таянади ва Хитойга туҳмат қилишга бўлган навбатдаги уринишдан бошқа нарса эмас».
Times хабарига жавоб берар экан, Nvidia вакили Жон Рицзо шундай деди: «Жансеннинг Хуанг хоним билан мулоқотлари ғайриодатий ёки кутилмаган ҳолат эмас».
Унинг таъкидлашича, Megaspeed каби мижозлар «одатий тижорат маълумотларини олишади, Nvidia’нинг махфий савдо сирларини ёки миллий хавфсизликка оид ҳеч қандай маълумотни эмас».
У, шунингдек, Сингапур компанияси Хитойга чипларни ноқонуний олиб ўтгани ҳақидаги даъволар «ўтган йили синчковлик билан текширилгани ва ўз тасдиғини топмаганини» қўшимча қилди.
Ушбу хабар АҚШнинг сунъий интеллект тизимларини ривожлантириш учун жуда муҳим деб қаралувчи илғор компьютер технологияларидан Хитойнинг фойдаланиши бўйича узоқ вақтдан бери мавжуд бўлган хавотирлари фонида пайдо бўлди.
Жансен Хуанг Nvidia’га ўз маҳсулотларини Хитойга кўпроқ сотишга рухсат бериш глобал СИ саноатида АҚШнинг рақобатбардошлигини сақлаб қалиш учун муҳим деб таъкидлаб келади.
Бироқ, Вашингтон миллий хавфсизлик хавотирлари ва бу технология Хитойнинг ҳарбий операцияларини кучайтириши мумкинлиги хавфини важ қилиб, 2022 йилдан бери Nvidia’нинг энг илғор чипларини Хитойга экспорт қилишни чеклаб қўйган. Шу билан бирга, Трамп маъмурияти даврида чекловлар бироз юмшатилган эди.
АҚШ расмийлари бир нечта фирмалар чипларни Хитой чегараси орқали ноқонуний олиб ўтаётганда ушланганини маълум қилди. Улар, шунингдек, учинчи мамлакатлар орқали фаолият юритаётган компаниялар Хитой корхоналарига чекланган технологияларни олишда ёрдам бераётган ёки бермаётганини текширмоқда.
Nvidia амалдаги экспорт қонунларига амал қилишини ва унинг чиплари Хитойга ноқонуний олиб ўтилгани ҳақида ҳеч қандай далил йўқлигини билдирган.
Megaspeed компаниясининг амалдаги раҳбарияти ушбу айбловларга жиддий қарашини ва ички тергов ўтказиш учун ташқи юридик маслаҳатчиларни ёшлаганини маълум қилди. Компания, шунингдек, АҚШ ҳукуматига ҳамкорлик қилишга тайёрлигини билдирганини айтди.
Элис Хуангнинг Megaspeed билан ҳозирда қанчалик яқин алоқада экани номаълумлигича қолмоқда.