Умарали Раҳмоналиев ўйнаётган «Сабах» Чемпионлар лигасидаги илк ғалабасини қўлга киритди
Ўзбекистон терма жамоаси ярим ҳимоячиси Умарали Раҳмоналиев тўп сурадиган Озарбайжоннинг «Сабах» клуби УЕФА Чемпионлар лигаси асосий босқичининг иккинчи турида Праганинг «Славия» жамоасини 2:0 ҳисобида мағлуб этди. Боку клуби учун бу турнирнинг асосий босқичидаги илк ғалаба бўлди.
Умарали Раҳмоналиев ўйнаётган «Сабах» Чемпионлар лигасидаги илк ғалабасини қўлга киритди
Озарбайжоннинг «Сабах» футбол клуби УЕФА Чемпионлар лигаси асосий босқичининг иккинчи турида Чехиянинг «Славия» клубини 2:0 ҳисобида мағлуб этди.
Ўзбекистон терма жамоаси ярим ҳимоячиси Умарали Раҳмоналиев Озарбайжон жамоаси таркибида майдонга тушди.
Биринчи бўлимда мезбонлар тўпни тўрга йўллашди, аммо Кахим Пэрриснинг голи VAR кўрувидан сўнг офсайд сабабли бекор қилинди.
«Славия» ҳам бир нечта хавфли вазиятларни юзага келтирди, аммо «Сабах» дарвозабони Стас Покатилов ўз дарвозаси дахлсизлигини сақлаб қолди. Жамоалар танаффусга 0:0 ҳисобида йўл олишди.
49-дақиқада «Сабах» ҳисобни очди. Хорватиялик ярим ҳимоячи Хрвое Лепиница чап қанотдан узатма берди, шундан сўнг Пэррис дарвозани ишғол қилди.
Учрашув якунида, 88-дақиқада Жой-Ланс Микелс мезбонларнинг устунлигини оширди. «Славия» дарвозабони Маркович жарима майдончасидан ташқарига муваффақиятсиз чиққанидан сўнг, «Сабах» футболчиси тўпни эгаллаб олди ва узоқ масофадан бўш дарвозага зарба йўллаб гол урди.
ESPN маълумотларига кўра, Ўзбекистон терма жамоаси ярим ҳимоячиси Умарали Раҳмоналиев Праганинг «Славия» клубига қарши ўйинда (2:0) тўпга 58 марта тегинди, иккита зарба йўллади, иккаласи ҳам дарвоза соҳасига аниқ борди. Кутилаётган голлар (xG) кўрсаткичи 0,29 ни, кутилаётган голли узатмалар (xA) эса 0,47 ни ташкил этди.
Бундан ташқари, ўзбекистонлик футболчи бешта тўпни олиб қўйишни амалга оширди ва саккизта яккакурашда иштирок этди. У самарали ҳаракатлар — голлар ва голли узатмалар билан ажралиб турмади.
13 октябрь куни 2026/2027 йилги мавсум УЕФА Чемпионлар лигаси асосий босқичи иккинчи турининг яна саккизта ўйини бўлиб ўтди.
Иккинчи турнинг қолган тўққизта учрашуви 14 октябрга белгиланган.
Эслатиб ўтамиз, «Сабах» 2026 йилнинг августида тўртта квалификация раундидан ўтиб, илк бор Чемпионлар лигасининг асосий босқичига йўл олган эди.
Квалификация плей-офф босқичининг жавоб ўйинида Озарбайжон клуби Израильнинг «Апоэл» жамоасини 5:2 ҳисобида, икки ўйин натижасига кўра эса 6:4 ҳисобида мағлуб этди. Раҳмоналиев жавоб ўйинида «Сабах» голларидан бирига муаллифлик қилди.
Ярим ҳимоячи 2025 йилнинг январидан бери «Сабах»да ўйнаб келмоқда. Аввалига у Қозоннинг «Рубин» клубидан ижара ҳуқуқи асосида ўтди, 2026 йилнинг январида эса трансфер тўлиқ амалга оширилди.
Чемпионлар лигаси асосий босқичининг биринчи турида «Сабах» Англиянинг «Манчестер Юнайтед» клубига имкониятни бой бериб қўйганди.
Озарбайжон клуби турнирдаги навбатдаги ўйинини 20 октябрь куни Дортмунднинг «Боруссия»сига қарши ўтказади.