Украина жанг майдони маълумотларини Британия билан бўлишади
Украина ва Буюк Британия сунъий интеллектдан ҳарбий мақсадларда фойдаланиш бўйича ҳамкорлик тўғрисида келишув имзолади. Унга кўра, Киев Россия босқинига қарши уруш давомида тўпланган миллионлаб жанг майдони видеоларини Лондонга тақдим этади. Ушбу маълумотлар сунъий интеллект тизимларини ўқитиш ҳамда ҳарбий обьектлар, аеропортлар, темирйўл тармоқлари ва электр стансияларини дронлардан ҳимоя қилиш технологияларини ривожлантиришда қўлланади.
Украина жанг майдонидаги маълумотларни Британияга тақдим этади.
24-август куни Киевда бўлиб ўтган «Кўнгиллилар коалицияси» йиғилишидан сўнг, Буюк Британия бош вазири Энди Бёрнем Украина ва Британия ҳарбий мақсадларда сунъий интеллектдан фойдаланиш бўйича ҳамкорлик шартномасини имзолаганини эълон қилди.
Ушбу келишув Британияга Россия ҳужумларини қайтариш жараёнида Украина томонидан тўпланган материаллардан сунъий интеллект технологияларини ривожлантиришда фойдаланиш имкониятини беради.
Британия бош вазирининг сўзларига кўра, бу ҳамкорлик Украинанинг «тенгсиз жанг тажрибаси»ни Буюк Британиянинг «жаҳон даражасидаги сунъий интеллект экотизими» билан бирлаштиради.
Украинадаги ҳарбий ҳаракатлар давомида тўпланган маълумотлар Британияда синовдан ўтказилади. Улардан ҳарбий базалар, аеропортлар, темирйўл тармоқлари, электр стансиялари ва қамоқхоналар каби муҳим обьектларни учувчисиз учиш аппаратларидан ҳимоя қилиш тизимларини такомиллаштиришда фойдаланиш режалаштирилган.
Ҳамкорлик доирасида Киев Лондонга жанг майдонидан олинган миллионлаб видеоёзувларни тақдим этади.
«Авенгер» («Қасоскор») номи билан юритиладиган ушбу маълумотлар тўплами ҳозирда Украинанинг автоном дронларини бошқаришга мўлжалланган сунъий интеллект тизимларини ўқитишда қўлланилмоқда.
Британия томони бу маълумотларни сунъий интеллектни ҳарбий шароитларга мослаштириш учун ўта қимматли манба сифатида баҳолади.
Жанг майдонида олинган видеолар сунъий интеллект моделларига дронлар, ҳарбий техника, ҳаракатланаётган нишонлар ва турли таҳдидларни реал шароитда аниқлашни ўргатиш имконини бериши мумкин.
Украина маълумотлар тақдим этиши эвазига Буюк Британия Киевга технологиялар соҳасида қўшимча кўмак кўрсатади.
Бунда Британия университетлари, олимлари ва технологик компанияларининг имкониятларидан фойдаланиш, шунингдек, мамлакатнинг сунъий интеллект экотизимини Украина билан ҳамкорликка жалб қилиш режалаштирилган.
Бёрнемнинг таъкидлашича, ҳамкорлик нафақат миллий хавфсизлик имкониятларини кучайтиради, балки муҳим инфратузилмани яхшироқ ҳимоя қилиш ва иқтисодий ўсишга хизмат қилувчи технологияларни тезроқ ривожлантириш имконини беради.