Трамп Руанда ва Жанубий Африкани АҚШ савдо келишувидан чиқариб ташлайди
Ушбу қадам Руанда Мудофаа вазирлигига қарши АҚШ Молия вазирлиги томонидан санкциялар жорий этилганидан атиги бир ҳафта ўтиб амалга оширилди.
Трамп Руанда ва Жанубий Африкани АҚШ савдо битимидан чиқариш ҳаракатини бошлади
Ўтган йили Трамп Оқ уйда Президент Сирил Рамафоса билан ўтказилган учрашувда Жанубий Африкани оқ танлилар геноцидида айблаган эди.
АҚШ президенти Дональд Трамп Конгрессга 2027 йил 1 январдан бошлаб Жанубий Африка ва Руандани имтиёзли савдо дастуридан чиқаришни режалаштираётганини маълум қилди.
Африкада ўсиш ва имкониятлар тўғрисидаги қонун (Agoa) талабларга жавоб берадиган Африка давлатларига минглаб турдаги товарларни АҚШга божсиз экспорт қилиш имконини беради.
АҚШ Савдо вакили Жеймисон Грир ўз баёнотида йиллик текширув ҳар иккала мамлакат дастурга мувофиқлик қоидаларига мос келмайдиган амалиётларда иштирок этаётганини аниқлаганини айтди.
У, шунингдек, Трамп маъмурияти ушбу қарор ҳақида ҳар иккала мамлакатни алоҳида хабардор қилганини билдирди.
Трамп маъмурияти АҚШ савдоси ва инвестицияларига тўсиқлар, шунингдек, минтақадаги миллий хавфсизлик ва ташқи сиёсат манфаатларига оид хавотирларни рўкач қилди.
Руанда ҳолатида Вашингтон, шунингдек, инсон ҳуқуқлари, сиёсий плюрализм, қонун устуворлиги ва ходимлар ҳуқуқлари билан боғлиқ хавотирларни ҳам тилга олди.
Бу қарор АҚШ Молия вазирлиги томонидан Руанда Мудофаа вазирлигига қарши Конго Демократик Республикаси шарқидаги қуролли исёнга алоқадорлик айблови билан санкциялар жорий этилганидан атиги бир ҳафта ўтиб қабул қилинди.
АҚШ Молия вазирлигининг билдиришича, Руанда Мудофаа вазирлиги КДР шарқидаги М23 исёнчилари билан биргаликда жанг қилиш учун минглаб қўшинларни юборган ҳамда уларни қурол-яроғ, асбоб-скуноталар, логистика ва машғулотлар билан таъминлаган.
Жанубий Африка ҳолатида АҚШ, шунингдек, коррупция бўйича ҳам хавотир билдирди.
«Трамп маъмурияти африкалик ҳамкорларимиз мувофиқлик меъёрларига жавоб бериш учун зарур чораларни кўришини таъминлаш устида ишламоқда», деди Грир.
Ушбу эълон Вашингтон ва ҳар иккала мамлакат ўртасидаги муносабатлар таранглашган бир пайтда берилди ва режалаштирилган бекор қилиш уларнинг АҚШ билан имтиёзли савдо келишувларидан фойдаланиш имкониятига таҳдид солмоқда.
Ўтган йили Трамп Оқ уйда Президент Сирил Рамафоса билан учрашувда Жанубий Африкани оқ танлилар геноцидида айблаган ва африканерлар учун АҚШ қочқинлик дастурини ишга туширган эди.
АҚШнинг Жанубий Африкадаги элчиси Лео Брент Бозелл III Жанубий Африка сиёсати унинг Agoa дастуридан чиқарилишига олиб келгани афсусланарли ҳолат эканини айтди.
«Бу Жанубий Африка ҳукумати томонидан АҚШ билдирган реал хавотирларнинг рад этилиши оқибатида юзага келган, олдиндан тахмин қилиш мумкин бўлган ва олдини олиш мумкин бўлган оқибат эди», деб ёзди у X тармоғида.