Тошкентда вазирлик ва идораларнинг 7 та биноси 868,8 миллиард сўмга сотилди

Тошкентда 868,8 миллиард сўмга вазирлик ва идораларнинг 7 та биноси сотилди

Тошкентда илгари вазирлик ва идораларга тегишли бўлган 7 та маъмурий бино умумий қиймати 868,8 миллиард сўмга сотилди.

Сотилган объектлар қаторига Транспорт вазирлиги, Спорт вазирлиги, Қурилиш ва уй-жой коммунал хўжалиги вазирлиги, Туризм қўмитаси ҳузуридаги «Туристларга хизмат кўрсатиш маркази» ДУК, Автомобиль йўллари қўмитаси, Ипакчилик ва жун саноатини ривожлантириш қўмитаси ҳамда Давлат хизматлари агентлиги бинолари кирди. Яна 11 та объект бошланғич қиймати 1095,8 миллиард сўм билан савдога чиқарилган, 20 та объект бўйича эса сотуволди тайёргарлик ишлари олиб борилмоқда. Ҳозирги вақтда Давлат активларини бошқариш агентлиги, Камбағалликни қисқартириш ва бандлик вазирлиги, Техник жиҳатдан тартибга солиш агентлиги, Сув хўжалиги вазирлиги ва уларнинг тизим ташкилотлари бинолари бўйича савдолар давом этмоқда.

Кўчмас мулк савдоси Вазирлар Маҳкамасининг 2025 йил 7 мартдаги 146-сонли қарори доирасида амалга оширилмоқда. Ушбу ҳужжатда 150 та давлат органи ва давлат иштирокидаги ташкилотларни Янги Тошкент ҳудудига кўчириш, шунингдек, пойтахтдаги 83 та кўчмас мулк объектини очиқ савдоларда сотиш ёки ижарага бериш кўзда тутилган. Ҳозирги вақтда жараён режалаштирилган объектларнинг ярмидан кўпини қамраб олди: еттита бино аллақачон янги эгаларига ўтди, яна 31 та объект тайёргарлик ва сотишнинг турли босқичларида турибди.