Тошкент метросининг янги бекатларида поездлар келиш вақтини кўрсатувчи таблолар ўрнатилади
Ҳозирги бекатлардаги электрон таблоларда поезд келишига қанча вақт қолгани эмас, аввалги поезд кетганидан буён ўтган вақт акс этади. Мавжуд бекатларда янги тизимни жорий этишнинг аниқ муддати ҳозирча маълум эмас.
Тошкент метросининг янги бекатларида поездлар келиш вақтини кўрсатувчи таблолар ўрнатилади
Тошкент метрополитенининг келгусида барпо этиладиган янги линиялари ва бекатларида поездларнинг келиш ҳамда кетиш вақтини аниқ акс эттирадиган замонавий электрон таблоларни ўрнатиш режалаштирилмоқда. Бу ҳақда “Тошкент метрополитени” АЖ бошқаруви раиси ўринбосари Йўлдош Юсупов 3-ноябр куни маълум қилди, дея хабар бермоқда “Дарё” мухбири.
Ўша куни Контент тайёрлаш марказида ўтказилган матбуот анжуманидан кейин Юсупов журналистлар саволларига жавоб берди. “Дарё” мухбири метро бекатларидаги электрон таблоларда поезд келишига қанча вақт қолганини кўрсатиш тизимини жорий этиш имконияти билан қизиқди.
Юсуповнинг айтишича, ҳозир метро бекатларидаги электрон таблоларда навбатдаги поезд келгунига қадар қолган вақт эмас, балки олдинги поезд бекатдан жўнаб кетганидан бери ўтган вақт кўрсатилади. Мавжуд бекатларда замонавий таймер ва электрон соатларни ўрнатиш эса техник имкониятлар чеклангани сабабли қийин.
Бироқ президентнинг 2026-йил 15-майдаги 191-сонли қарорига мувофиқ, келгусида қуриладиган метро линиялари ва бекатларида поездларнинг келиш ҳамда кетиш вақтини аниқ кўрсатадиган интеллектуал электрон таблоларни босқичма-босқич жорий этиш режалаштирилган. Ҳозирча амалдаги бекатлардаги электрон таблоларнинг қачон янгиланиши бўйича аниқ муддат айтилмади.
Матбуот анжуманида метрополитен инфратузилмасини кенгайтириш ва поездлар ҳаракати интервалини қисқартириш юзасидан амалга оширилаётган ишлар ҳақида ҳам маълумот берилди.
Қайд этилишича, сўнгги етти йил ичида Тошкентда 33 километр янги метро йўналишлари қурилиб, 21 та бекат фойдаланишга топширилган. Натижада метрополитен бекатлари сони 50 тага, йўналишларнинг умумий узунлиги эса 71 километрга етган.
2021-йилда Тошкент метроси кунига ўртача 280–300 минг нафар йўловчига хизмат кўрсатган бўлса, 2026-йилда бу кўрсаткич 1,2 миллион нафардан ошган. Шунингдек, поездлар ҳаракати интервали Чилонзор йўналишида тиғиз вақтларда 1,5–2 дақиқагача, Ўзбекистон йўналишида 3 дақиқагача, Юнусобод йўналишида 4 дақиқагача, ер усти ҳалқа йўлида эса 8 дақиқагача қисқартирилган.
Метрополитен маълумотларига кўра, 2027-йилда яна 14 та замонавий, беш вагонли поезд таркибини харид қилиш режалаштирилган. Бундан ташқари, 2030-йилгача Тошкент метросининг кунлик йўловчилар сонини 1,8 миллион нафарга, бекатлар сонини 79 тага, йўналишларнинг умумий узунлигини эса 103 километрга етказиш белгиланган.