Тошкент метросига 14 та замонавий поезд қўшилди
Тошкент метрополитенида 56 та янги вагондан иборат 14 та замонавий поезд қатновга қўйилди. Натижада метронинг вагон парки қарийб 70 фоизга янгиланиб, тиғиз вақтларда йўловчиларнинг поезд кутиш вақти қисқарди.
Тошкент метроси 14 та замонавий поезд билан тўлдирилди
Транспорт вазирлиги берган маълумотга кўра, 2026-йилда харид қилиниши режалаштирилган барча янги поездлар ўқув йили бошланишигача етказиб келинган. Янги авлод поездлари метрополитеннинг тўртта йўналишида қатновни бошлаган.
Айни пайтда тиғиз соатларда поездлар қуйидаги интервалда ҳаракатланмоқда:
- Чилонзор йўналишида — 1,5–2 дақиқа;
- Ўзбекистон йўналишида — 3 дақиқа;
- Юнусобод йўналишида — 4 дақиқа;
- Ер усти ҳалқа йўли йўналишида — 7–8 дақиқа.
Вазирлик таъкидлашича, янги поездларнинг йўлга қўйилиши, айниқса, тиғиз пайтларда кутиш вақтини сезиларли даражада камайтирган.