Тўқаев президентлик сайловида иштирок этиш борасидаги саволга жавоб берди
Тўқаев президентлик сайловида иштирок этиш масаласига жавоб берди
Қозоғистон Конституциявий суди давлат раҳбари Қосим-Жўмарт Тўқаевнинг янги Конституция кучга кириши муносабати билан қайта сайланиш ҳуқуқига эга эканлигини эълон қилган эди. Президентнинг ўзи ушбу қарорга муносабат билдирди.
Журналист Қозоғистон раҳбаридан "2029-йилги президентлик сайловларида ўз номзодингизни кўрсатиш ҳуқуқидан фойдаланасизми ёки муддатидан олдин сайлов ўтказиладими?" деб сўради. Тўқаев бу борада гапиришга ҳали эрта эканини таъкидлади.
"Конституциявий суд шундай қарор қабул қилди. Бу қонуний ва қайта сайланиш ҳуқуқига эгаман. Аммо бўлажак сайловларга келсак ёки сиз айтганингиздек, қайси йилда сайловга номзодимни кўрсатаман ёки кўрсатмайман, бу ҳақда гапиришга ҳали эрта", деди у.
Қозоғистон раҳбари буни "мамлакат олдида жуда кўп вазифалар тургани" билан изоҳлади. Хусусан, у амалда бутун Қозоғистонни катта қурилиш майдонига айлантириш кераклигини, биринчи навбатда, бу фуқаролар учун ижтимоий обьектлар қурилишига тааллуқли эканини айтди. У бунинг учун Миллий фонддан маблағ ажратишга тайёрлигини билдирди.
"Нега биз пулларни халқ фаровонлиги йўлида фойдаланиш мумкин бўлган бир пайтда хориждаги қимматли қоғозларда ушлаб туришимиз керак? Мен бу пуллар устида пичан босган итдек ўтиришга қаршиман. Яъни улар халққа, фуқароларимизга хизмат қилиши керак. Табиийки, дунёдаги вазият таҳлил ва эътиборни талаб қилади. Таъбир жоиз бўлса, жар ёқасидан боряпмиз, шунга қарамай, тинч ички шароитларни таъминлай олдик, бу эса бизга ривожланиш имконини берди. Иқтисодий ўсиш аниқ, у обьектив ва асосий халқаро молия институтлари томонидан тасдиқланган", деди Тўқаев.
У президентлик сайловида иштирок этиши борасида, эҳтимол, келгусида аниқ жавоб беришини таъкидлади. Маълумот учун, 23-август куни Қозоғистонда бир палатали парламент — Қурултойга сайловлар бошланди. Қозоғистоннинг икки палатали парламенти 30-июн куни ўз ишини расман якунлаганди.
Ислоҳот қўшни республиканинг сиёсий тизимини тубдан ўзгартиради: икки палатали парламент — Сенат ва Мажлис ўрнига бир палатали Қурултой ташкил этилди. Вице-президент лавозими қайтарилди, янги маслаҳат органи — Халқ кенгаши пайдо бўлади, унинг аъзолари президент томонидан тайинланиши кутилмоқда.
Мамлакатда 1-июлдан бошлаб янги Конституция кучга кирганди. Март ойида қарийб 90 фоиз овоз билан унинг лойиҳаси маъқулланган. Янги Конституция амалдаги президент Қосим-Жўмарт Тўқаевга яна давлат раҳбари сайловида иштирок этиш имконини беради. Сабаби 1995-йилги Конституция бўйича айрим давлат лавозимларини эгаллаган шахслар янги Конституция кучга кирганидан кейин тегишли лавозимларга қайта сайланиши ёки тайинланиши мумкин.