Тинчлик бўйича Нобел мукофоти жанубий африкалик судяга берилди

Тинчлик бўйича Нобел мукофоти жанубий африкалик судяга топширилди

Ослода тинчлик бўйича Нобел мукофоти совриндори маълум қилинди. Бу йил Наванетҳем (Нави) Пиллей «тинчлик ва халқаро ҳуқуқни тарғиб қилишдаги саъй-ҳаракатлари учун» тақдирланди.

Пиллей хоним аввалроқ БМТнинг Руанда бўйича Халқаро жиноий трибуналида фаолият юритган, жумладан, трибунал раиси ҳам бўлган. У 2003-йилдан 2008-йилгача Халқаро жиноят суди (ХЖС) судяси сифатида ишлаган. 2008–2014-йилларда эса БМТнинг Инсон ҳуқуқлари бўйича олий комиссари лавозимини эгаллаган.

Жорий йилда дипломатия ва гуманитар фаолият соҳасидаги ушбу нуфузли мукофотга 287 нафар шахс ва ташкилот номзод қилиб кўрсатилган эди.

Номзодлар рўйхати 50 йил давомида махфий сақланади, шу сабабли жамоатчилик унда Доналд Трампнинг номи бор-йўқлигини ҳали узоқ вақт билолмайди: у бир неча йилдан бери ўзига шундай мукофот берилишини сўраб келади.

АҚШ президенти «саккизта урушга чек қўйгани»ни ва мукофотга энг муносиб инсон эканини таъкидлайди.

«Улар мендайларга мукофот бермайдиган одамлар. Ва менимча, бу уларни обрўсизлантиради. Мен буни нафрат юзасидан айтаётганим йўқ», – деди Трамп шу кунларда ҳам бу мавзуга қайтиб.

Манбаларга кўра, Ослодагилар Эронга қарши бошланган уруш, ҳудудий даъволар, хусусан, Гренландияга оид даъволар, муҳожирларга нисбатан қатъий сиёсат, шунингдек, халқаро ҳамкорлик ва оммавий ахборот воситаларига ҳужумлари сабаб Америка президентини муносиб номзод деб ҳисобламайди.

Шу билан бирга, Трамп Нобел қўмитасининг олтин медалига эга. 2025-йилда тинчлик бўйича Нобел мукофотини олган венесуелалик мухолифатчи Мария Корино Мачадо ўз медалини унга берган эди.

У Венесуела президенти Николас Мадуро Америка кучлари томонидан қўлга олинганидан кейин Трампни мукофотга лойиқ деб топган эди. Бироқ бунинг эвазига у Оқ уйнинг сиёсий қўллаб-қувватловига эриша олмади.

Ҳар бир Нобел мукофоти диплом, олтин медал ва 1,2 миллион доллар миқдоридаги пул мукофотини ўз ичига олади.