Сурхондарёда мансабдор шахс ёшларни овоз йиғишга мажбурлагани учун жазоланди
Сариосиё тумани ёшлар ишлари бўлими бошлиғи овоз йиғишга мажбурлагани учун маъмурий жавобгарликка тортилди.
Сурхондарёда мулозим ёшларни овоз йиғишга мажбурлагани учун жавобгарликка тортилди
Сурхондарё вилояти Сариосиё тумани Ёшлар ишлари бўлими бошлиғи Р. Раҳматжонов «Очиқ бюджет» ташаббуси доирасидаги лойиҳаларга ёшлар етакчиларини овоз йиғишга мажбурлагани тўғрисидаги хабарлар текширилганидан сўнг маъмурий жавобгарликка тортилди. Бу ҳақда Давлат меҳнат инспекцияси хабар бермоқда.
Аввалроқ ижтимоий тармоқларда мансабдор шахс ёшлар етакчиларини «Очиқ бюджет» лойиҳалари учун мажбурий тартибда овоз йиғишга жалб қилгани, шунингдек, уларга нисбатан ҳақоратли муносабатда бўлгани ҳақида хабарлар тарқалган эди.
Давлат меҳнат инспекцияси ушбу маълумотларни белгиланган тартибда ўрганиб чиқди.
Текширув якунларига кўра, ижтимоий тармоқларда тарқалган маълумотлар ўз тасдиғини топди.
Р. Раҳматжоновга нисбатан Ўзбекистон Республикаси Маъмурий жавобгарлик тўғрисидаги кодексининг 51-моддаси асосида маъмурий жавобгарлик чораси қўлланилди.
Ушбу модда қонунда назарда тутилган ҳоллардан ташқари, меҳнатга бирон-бир шаклда маъмурий тарзда мажбурлаганлик учун жавобгарликни назарда тутади.
Давлат меҳнат инспекцияси мажбурий меҳнатга йўл қўйиш қонун бузилиши ҳисобланишини таъкидлади.
Инспекция меҳнат ва меҳнат ҳуқуқларини ҳимоя қилиш соҳасидаги қонунчиликка риоя этилиши устидан давлат назоратини амалга оширишни давом эттирмоқда.