Сўровнома: Йўлкира ошишига одамлар қандай фикрда?
Тошкентда 1-октабрдан автобус ва метро йўлкираси амалдаги 1 700 сўмдан 2 500 сўмга оширилиши кутилмоқда. Шунингдек, транспорт карталари учун янги тариф режалари ва йўловчиларга бир соат ичида транспорт алмаштиришда имтиёзли тарифлар жорий этилиши режалаштирилган. Kun.uz йўлкира ошишига ҳамшаҳарларнинг муносабати қандай эканини ўрганди.
Сўровнома: Йўлкира ошишига одамлар қандай қарайди?
Сўровда қатнашган айримлар йўлкиранинг кўтарилишини одатий ҳолат деб баҳолади. Уларнинг айтишича, транспортнинг ўз харажатлари бор ва тарифнинг ошиши ана шу харажатларни қоплашга ёрдам бериши мумкин.
«Замон талаби, ҳамма жойда нарх-наво кўтариляпти. Транспортнинг ўз харажатлари бор», - дейди сўров иштирокчиларидан бири.
Яна бир фуқаро метро ва транспорт тизимининг харажатларини инобатга олганда, янги тарифни тушуниш мумкинлигини айтди. Унинг фикрича, амалдаги нарх транспорт харажатларини тўлиқ ёпмаслиги эҳтимол.
Баъзилар эса электрон тўловдаги чегирмалар ва имтиёзлар сабаб янги тарифни унча сезмаслигини билдирди.
«Агар ҳозиргидек АТТО карталарда ёки қайсидир банк карталарида скидкалар бўлса, масалан, 990 сўмлик чегирмалар бўлса, мен учун унчалик сезилмайди. Шу чегирмалар бўлса, йўлкиранинг ошиши катта фарқ қилмайди», - деди фуқаролардан бири.
Сўровномада қатнашганларнинг ҳаммаси ҳам бу фикрда эмас. Айрим респондентлар ҳозирги 1 700 сўмлик тарифни сақлаб қолиш кераклигини, айниқса талабалар ва жамоат транспортидан кўп фойдаланадиган қатлам учун бу сезиларли таъсир қилиши мумкинлигини айтди.
«Студентларга қийин бўлади. Ўқиш билан бирга ишлайдиганлар ҳам бор, шунинг учун қийинроқ бўлади», - деди сўров иштирокчиларидан бири.
«Сифатни ошириш, транспорт сифатларини яхшилаш бўлиши керак», - деди респондентлардан бири.
Бунгача Тошкентда автобус ва метро йўл ҳақи 1 400 сўм бўлган ва бу тариф 2019-йил 15-августдан амал қилган.