Сирдарёда сотувчи аёлга шаҳвоний шилқимлик қилган эркак 5 суткага қамалди
Оқолтин туманидан ўтган М39 йўли бўйида савдо қилаётган аёлга пул эвазига жинсий алоқа таклиф этган эркакка суд ҳукми ўқилди. У ҳаракатларини мастликда содир этганини айтиб енгиллик сўраган. Суд эркакка 5 сутка маъмурий қамоқ жазоси тайинлади.
Сирдарёда сотувчи аёлга шаҳвоний шилқимлик қилган эркак 5 суткага қамалди
Сирдарё вилоятининг Оқолтин туманида йўл бўйида савдо қилаётган аёлга нисбатан шаҳвоний шилқимлик қилган эркакка суд ҳукми чиқарилди.
Иш материалларига кўра, воқеа М39 автомобил йўли бўйида юз берган. Маст ҳолатдаги эркак сотувчи аёлнинг ёнига келиб, унга пул эвазига жинсий алоқа қилишни таклиф қилган ва шаҳвоний шилқимлик ҳаракатларини амалга оширган.
Жабрланувчи аёл бу ҳолатдан норози бўлиб, ички ишлар органларига мурожаат қилган. ИИБ ходимлари ҳолатни ўрганиб, ҳуқуқбузарга нисбатан Маъмурий жавобгарлик тўғрисидаги кодекснинг 41−1-моддаси 1-қисми (Шаҳвоний шилқимлик қилиш) бўйича маъмурий баённома расмийлаштирган ва иш судга юборилган.
Суд мажлисида ҳуқуқбузар ўз айбини тўлиқ тан олиб, ҳаракатларини мастликда содир этганини айтган ва енгиллик сўраган. Жабрланувчи аёл эса эркакка нисбатан қонун доирасида қатъий чора кўрилишини талаб қилган.
“Қаттиқ чора кўринг. Бунақалар келиб, шу нарсани қилаверадими? Ўғилларим бундан катта ёшда… Энг асосийси, масала катталашиб кетмасин деб, ўзим ҳал қилдим ва орган ходимларига топширдим”, — деди жабрланувчи аёл судда.
Суд жабрланувчининг даъвоси ва аниқланган ҳолатларни инобатга олиб, эркакка Маъмурий жавобгарлик тўғрисидаги кодекснинг 41−1-моддаси 1-қисми билан 5 сутка маъмурий қамоқ жазоси тайинлади.
Бундан ташқари, суд жабрланувчи аёлга етказилган моддий ва маънавий зарарни ундириш бўйича фуқаролик ишлари бўйича судга мурожаат қилиш ҳуқуқи мавжудлигини тушунтирди.