Шимолий Корея икки қаватли уранни бойитиш иншоотини қурди, дейди кузатувчи ташкилот

Шимолий Корея икки қаватли уранни бойитиш иншоотини барпо этди, дейди кузатувчи ташкилот

Шимолий Корея 2022 йилда ўзини ядровий давлат деб эълон қилди ва ўз қуролларидан ҳеч қачон воз кечмасликка ваъда берди

Халқаро атом энергияси агентлиги (ХАЭА) Шимолий Корея ўзининг асосий Ёнбёндаги ядровий мажмуасида янги икки қаватли уранни бойитиш иншоотини қурганини маълум қилди.

Хабар қилинишича, янги иншоот уранни бойитиш учун ишлатиладиган йигирма саккизтагача центрифуга каскадларини жойлаштириш имкониятига эга.

Ядровий кузатувчи ташкилот директори Рафаэль Гросси қурол даражасидаги материалларнинг узлуксиз ишлаб чиқарилишини "жиддий хавотир" уйғотувчи масала деб таърифлади.

ХАЭА, шунингдек, Пхеньян бошқа бойитиш объектида кенгайтирилган қўшимча бинони ишга туширганини маълум қилди. Сунъий йўлдош тасвирларига асосланган ушбу хулосалар Шимолий Корея ядровий инфратузилмасининг кенгайишда давом этаётганидан далолат беради.

Шу ҳафта бошида эълон қилинган баёнотда Гросси Ёнбёнда янги бино пайдо бўлганини айтди. 2009 йилда Пхеньян томонидан чиқариб юборилган агентликнинг Шимолий Кореяда инспекторлари йўқ ва ўз баҳолашларида сунъий йўлдош тасвирларига таянади.

28 август куни чоп этилган ҳисоботга кўра, ХАЭА бинонинг мавжудлигини илк бор шу йилнинг июнь ойида қайд этган. Ҳисоботда айтилишича, етакчи Ким Чен Ин 3 июнь куни "янги ишга туширилган ядровий материаллар ишлаб чиқариш заводи"га ташриф буюрган ва ташкилот уни Ёнбёндаги бойитиш иншооти деб топган.

ХАЭА ҳисоботига кўра, Ким мамлакатнинг "сезиларли даражада кенгайтирилган ишлаб чиқариш қувватини" олқишлаб, бу "йирикроқ режаларни амалга ошириш имкониятини тақдим этишини" айтган.

ХАЭА, шунингдек, шу йилнинг январь ойида пойтахт Пхеньян яқинидаги Кангсондаги бошқа бойитиш иншоотида ҳам ишлар бошлангани белгилари борлигини маълум қилди. Унда айтилишича, Кангсонда қўшимча бино илк бор 2024 йилда қурилган.

Ҳисобот сунъий йўлдош тасвирлари, очиқ манбалардаги маълумотлар ва давлат ОАВларидаги фотосуратларга асосланган.

"КХДР ядровий дастурининг давом эттирилиши ва янада ривожлантирилиши БМТ Хавфсизлик Кенгашининг тегишли резолюцияларини очиқдан-очиқ бузиш ҳисобланади ва бундан чуқур афсусдамиз", деди Гросси шу ҳафта бошида эълон қилинган баёнотида.

Шу йилнинг апрель ойида ХАЭА Шимолий Корея ядровий бомбалар ишлаб чиқариш қувватини ошираётганга ўхшашини билдириб, Ёнбённинг сезиларли даражада кенгайишини кузатиб бораётганини қайд этган эди.

Ким шу йил бошида "янги фойдаланишга топширилган" ядровий бойитиш объектида суратга тушган эди

Август ойида Жанубий Корея президенти Ли Чжэ Мён Шимолий Корея билан икки давлат ўртасидаги урушни расман тугатиш бўйича музокаралар ўтказишни таклиф қилиб, бу "Шимолнинг ядровий салоҳияти ривожланишини тўхтатишнинг самарали йўлларини" муҳокама қилиш учун майдон бўлиши мумкинлигини айтди.

Шимолий Корея ушбу таклифга ҳали жавоб бергани йўқ.

Шимолий Корея 2022 йилда ўзини ядровий давлат деб эълон қилди ва сони ўнлаб деб тахмин қилинадиган ўз қуролларидан ҳеч қачон воз кечмасликка ваъда берди.

Ли аввалроқ Пхеньян йилига яна 15-20 та жанговар каллак ишлаб чиқараётганини айтган ва ўтган йили BBC'га берган интервьюсида АҚШ Президенти Дональд Трамп ва Ким ўртасида ишлаб чиқаришни музлатиш бўйича келишувни қўллаб-қувватлашини билдирган эди.