Шахмат. Бибисора Ассаубаева нуфузли турнирда иккинчи медалини қўлга киритиб якуний босқичга йўл олди
Шахмат бўйича Қозоғистонлик гроссмейстер Бибисора Ассаубаева Франсиянинг Сен-Тропе шаҳрида бўлиб ўтган ВР Воменъс Чесс Тоур турнирининг блиц баҳсларида иккинчи ўринни эгаллаб, Гранд финалга йўлланма олди. Бу унинг ушбу нуфузли турнирдаги иккинчи медали бўлди.
Ярим финалда Ассаубаева германиялик Элизабет Пец билан куч синашди. Дастлаб 0,5:1,5 ҳисобида ортда қолган бўлса-да, кейинги партияда ҳисобни тенглаштира олди. Ғолиб тай-брейкда, аниқроғи, армагеддон партиясида аниқланди, унда Ассаубаева рақибини мағлуб этиб, финалга чиқди.
Финалда унинг рақиби украиналик Анна Музичук бўлди. Ассаубаева биринчи партияда ғалаба қозонди, аммо Музичук кейинги партияда ҳисобни тенглаштирди. Учинчи партия дуранг билан якунланди, чемпионлик тақдири эса тўртинчи партияда ҳал бўлди.
Ҳал қилувчи партияда қора доналарда ўйнаган Ассаубаева мағлубиятга учради. Натижада, Музичук 2,5:1,5 ҳисобида ғалаба қозониб, бош соврин ва 7 000 доллар мукофот пулига эга чиқди. Бибисора Ассаубаева 7,5 очко билан кумуш медални қўлга киритди. Учинчи ўрин Элизабет Пецга насиб этди.
Эслатиб ўтамиз, 25-август куни Сен-Тропеда ўтказилган рапид турнирида Ассаубаева украиналик Мария Музичукни 2:0 ҳисобида мағлуб этиб, олтин медални қўлга киритган эди.
Шу тариқа, қозоғистонлик шахматчи ВР Воменъс Чесс Тоур мусобақасининг Франсиядаги босқичини олтин ва кумуш медал билан якунлади.
Бу натижа Бибисора Ассаубаевага Европа босқичининг Гранд финалида иштирок этиш ҳуқуқини берди. Ҳал қилувчи турнир 22–23-ноябр кунлари Германиянинг Штутгарт шаҳрида бўлиб ўтади.
Маълумот учун, ВР Воменъс Чесс Тоур — аёллар шахматини ривожлантириш ва оммалаштиришга қаратилган янги халқаро лойиҳа бўлиб, унинг умумий мукофот жамғармаси 200 минг АҚШ долларини ташкил этади. Йил давомида турнир босқичлари Токио, Пунта-Кана, Мапуту ва Сен-Тропе шаҳарларида ўтказилади. Ҳар бир босқичга дунёнинг етакчи 8 нафар шахматчиси таклиф этилади, якунда энг юқори натижа кўрсатган икки спортчи ноябр ойида Штутгартда бўлиб ўтадиган якуний босқичга йўлланма олади.