Шавкат Мирзиёев Қашқадарёда Синьцзян технологияси бўйича пахта етиштириш билан танишди
Шавкат Мирзиёев Қашқадарёда Синьцзян технологияси бўйича пахта етиштириш жараёни билан танишди
Президент Шавкат Мирзиёев Қашқадарё вилоятининг Ғузор туманидаги "Қашқадарё Жингу" корхонаси томонидан Синьцзян технологияси бўйича пахта етиштирилаётган пахта даласида бўлди.
Давлат раҳбарига уруғ экиш, суғориш ва экинларни парваришлашда қўлланилаётган усуллар кўрсатилди. 2,2 минг гектар майдонда чигит плёнка остига қўшқатор қилиб экилган, суғориш эса тўлиқ томитиб суғоришга ўтказилган. Плёнка қўлланиши тупроқда намлик ва иссиқликни сақлашга ёрдам бериб, нийҳолларнинг эрта ва қийғос унаб чиқишини таъминлайди, сув ва ўғитларнинг ўсимлик илдизига манзилли етказиб берилиши эса сув сарфини 30–40 фоизга, ўғитларни деярли 30 фоизга камайтиради, бунда ҳосилнинг етилиши анъанавий усулларга нисбатан 10–15 кунга тезлашади.
Президент шунингдек, ҳосил йиғим-терими якунлари ва дала ишларини тезлаштирадиган ҳамда ёнилғи сарфини камайтирадиган агродронлар фаол қўлланилаётган агротехник жараёнларнинг ташкил этилиши билан танишди. Синьцзян усулининг жорий этилиши стандарт 30–35 центнер ўрнига гектаридан 60–70 центнергача пахта олиш имконини беради. Корхона далаларида ўртача ҳосилдорлик гектарига 55 центнерга етди, ялпи ҳосил йиғими эса 12,3 минг тонна хомашёни ташкил этди.
Хитой инвестициялари иштирокида ташкил этилган "Қашқадарё Жингу" агрокластери Косон, Нишон, Ғузор, Кўкдала ва Миришкор туманларидаги 18,3 минг гектар майдонни қамраб олади. Ушбу ерларнинг салмоқли қисмини илгари фойдаланилмаган ва чўл ҳудудлар ташкил этган. Лойиҳани амалга оширишга 128 миллион доллар йўналтирилган, 50 та иш ўрни яратилган, маҳсулот экспорти ҳажми эса 8,5 миллион долларга етган. Бундан ташқари, ташриф давомида давлат раҳбарига ҳудуд қишлоқ хўжалигини ривожлантириш бўйича ҳисобот тақдим этилди.