Самоа етакчиси 2007 йилги видео пайдо бўлганидан кейин нацистларча саломлашгани учун узр сўради
Шмидт ўз ҳаракатлари «ноўрин бўлгани ҳамда хафагарчилик ва озор етказиши мумкинлигини» тан олди.
Самоа етакчиси 2007 йилги видео пайдо бўлганидан кейин нацистларча саломлашгани учун узр сўради
Самоа ва немис илдизларига эга бўлган Шмидт 2025 йил сентябрида бош вазир лавозимига киришган эди
Самоа бош вазири оилавий йиғилишда «Heil Hitler» дея нацистларча саломлашгани акс этган видео пайдо бўлганидан кейин узр сўради.
2007 йил июль ойида суратга олинган етти сониялик видеода Лааулиалемалиетоа Леуатеа Шмидтнинг ўн чоғли одамга бошчилик қилиб салом бераётгани акс этган. «Ўнг қўлингизни кўтаринг, Heil Hitler!» дейди у ва кейин гуруҳга жавоб қайтаргани учун миннатдорчилик билдиради.
Шмидт ўз сўзлари ва ҳаракати «ноўрин бўлгани ҳамда хафагарчилик ва озор етказишга қодирлигини» тан олди ва бу видео шахсий йиғилишда ёзиб олингани ҳамда «жамоатчилик учун мўлжалланмаганини» қўшимча қилди.
«Мен нацизм, антисемитизм, ирқчилик ва сиёсий экстремизмнинг барча шаклларини рад этаман», деди Шмидт душанба куни Facebook'да эълон қилинган баёнотида.
Унда айтилишича, видео 2007 йил июль ойида Шмидтлар оиласининг учрашувида, Шмидт парламент спикери ўринбосари бўлган вақтда суратга олинган ва оила аъзоларидан бирининг сўзларига кўра, у йиғилишда бошловчилик қилган.
Аҳолиси тахминан 221 000 кишидан иборат кичик орол давлати бўлган Самоа Янги Зеландия ва Гавайи ороллари оралиғида жойлашган.
У ХХ аср бошларида Германия назорати остида бўлган, бироқ колонизация Биринчи жаҳон уруши бошланганидан кўп ўтмай тугаган.
Самоа ва немис илдизларига эга бўлган Шмидт 2025 йил сентябрида мамлакатнинг саккизинчи бош вазири сифатида иш бошлаган эди.
У қасамёд қилиш маросимида яҳудийларнинг ибодат ёпинчиғини таққан ва бош вазирлигининг дастлабки кунларида Самоа «Исроил билан бирга эканини» айтиб, Исроилни қўллаб-қувватлашини аниқ билдирган эди.
«Агар бу бутун дунёдаги одамларга ёқмаса, бу уларнинг иши, лекин Самоа Худонинг замини билан бирга... Мамлакатимиз ишонадиган ягона Худо бор, у ҳам бўлса Исроил Худосидир», деган эди у.