АҚШдаги энг кекса маҳбус вафот этди: у 75 йилини қамоқда ўтказди
АҚШнинг энг кекса маҳбуси, Френсис Клиффорд Смит, 75 йилдан ортиқ вақтини қамоқда ўтказиб, табиий ўлим топди. У саккиз марта қатл этилишга буюрилган ва ҳар сафар "сўнгги кечки таом"ни тановул қилган бўлса-да, ижро ҳар доим кейинга қолдирилган.
Смит Коннектикут қамоқхонасида 75 йилдан зиёд умр кечирди. У илк бор 1950-йилда ўлим жазосига ҳукм қилинган эди. Бироқ, умрининг охиригача ўзи содир этмаган қотиллик учун қамалганини таъкидлаб келди. Унинг иши бўйича ўнлаб йиллар давомида кўплаб шубҳалар мавжуд эди.
1949-йил 23-июл куни эрта тонгда Гринвичдаги яхта клубда ўғрилик содир бўлган ва тунги қоровул Гровер Ҳарт отиб ўлдирилган. 25 ёшли Смит ушбу қотилликда айбдор деб топилган. Ҳарт 22 калибрли револвер ўқидан ҳалок бўлган, аммо жиноят жойидан топилган бошқа бир ўқ ва тўртта гилза бошқа қуролга тегишли бўлган. Бу ҳолат судни жиноятчилар икки киши бўлган деган хулосага олиб келган.
Жорж Лоуден исмли гумондор ўз айбини тан олган. Смитга қарши эса асосан эҳтимолий далиллар гувоҳлик берган. Ню-Ёрк штатидаги кафе қаршисида тўхтатилган кулранг Садиллас машинасидан жиноят қуролларидан бири, шунингдек, яхта клубдан ўғирланган тақинчоқлар ва бошқа буюмлар топилган. Смит ушбу кафеда бироз аввал кўринган эди. Бундан ташқари, машинадан унга тегишли деб тахмин қилинган кўйлак ҳам топилган. Бу далиллар унга ҳукм чиқариш учун етарли бўлган.
Смитни қатл қилиш санаси саккиз марта белгиланган ва саккиз марта бекор қилинган. 1954-йилда ўлим жазоси умрбод қамоқ жазосига алмаштирилган. 1967-йилда у қамоқдан қочишга муваффақ бўлган ва 12 кун эркинликда юрган. 1975-йилда Смит шартли равишда озодликка чиқарилган. Бироқ, тахминан 10 ой ўтиб, ўғрилик ва ноқонуний қурол сақлашда айбланиб, яна қамоққа қайтарилган.
Осборн қамоқхонасида Смитга "осборнлик қушбоқар" деган лақаб берилган. У кийимига нон яшириб, қушларни боқиб юрган. Қамоқхона қўриқчилари буни билган ва бунга кўз юмган. Смит 2020-йилдагина қамоқхонадан чиқарилган. Лекин у қариялар уйида назорат остида яшашда давом этган. У 2026-йил июн ойининг охирида, 101 ёшида, ухлаб ётганида ўз ажали билан вафот этди.