Саида Мирзиёева CCA Tashkent-ни Марказий Осиёдаги бундай форматдаги биринчи институция деб атади
Тошкентда кўргазма, таълим ва тадқиқот майдонларига эга янги маданий кластер — CCA Tashkent очилди.
Саида Мирзиёева CCA Tashkent’ни Марказий Осиёдаги бундай форматдаги биринчи институция деб атади
Тошкентда кўргазма ва таълим майдонлари, кутубхона, концепт-стор, шунингдек, учрашувлар ва тадқиқотлар учун майдончаларни бирлаштирган CCA Tashkent Замонавий санъат маркази ўз фаолиятини бошлади.
Ўзбекистон Президенти Администрацияси раҳбари Саида Мирзиёева ўзининг Telegram-каналида маълум қилишича, ушбу мажмуа Марказий Осиёда бундай форматдаги биринчи институцияга айланди.
Марказ 1912 йилда қурилган собиқ дизель электростанцияси биносида жойлашган. Тарихий объектнинг меъморий трансформациясини Studio KO халқаро бюроси амалга оширди.
CCA Tashkent’да кўргазмалар ва тадқиқот лойиҳалари, маърузалар ва мунозаралар, кинонамойишлар, концертлар ҳамда перформанслар ўтказиш режалаштирилган. Шу тариқа, майдонча замонавий маданий ва бадиий фаолиятнинг турли йўналишларини бирлаштиради.
Лойиҳада рассомлар, кураторлар ва халқаро ташкилотлар билан ҳамкорлик қилишга алоҳида эътибор қаратилган.
Саида Мирзиёеванинг сўзларига кўра, марказ ўзбекистонлик муаллифларни илгари суриш, уларнинг аудиториясини кенгайтириш ва мамлакат ташқарисида танилишини оширишга кўмаклашиши керак.
У CCA Tashkent’нинг очилишини Ўзбекистонда халқаро даражадаги яна бир замонавий маданий майдончанинг пайдо бўлиши деб атади.
Марказнинг ташкил этилиши Ўзбекистон Президенти ташаббуси ҳамда Ўзбекистон Маданият ва санъатни ривожлантириш жамғармасининг меҳнати туфайли амалга ошди.